Энэ сарын 17-нд эх орондоо ирсэн хуульч, блоггер Алексей Навальныйг дэмжигчид ОХУ-ын багадаа 85 хотод жагсаж байна. Түүнийг ХБНГУ-д эмчлүүлж байхад "Новичок"-оор хордуулсныг тогтоосон бөгөөд эх орондоо ирэхэд нь шоронд хорьсонд иргэд бухимдлаа илэрхийлэн жагсжээ. Түүнийг шоронд хорьсноос хоёр хоногийн дараа Алексей Навальный гэх ютүб хуудаснаа "Путиний ордон" хэмээх баримтат кино цацагдсанаар иргэд өөрсдийн эсэргүүцлээ зарлав. Уг баримтат кинонд Ерөнхийлөгч Владимир Путиний тушаалаар Навальныйг хордуулсан хэмээсэн бөгөөд Путин болон эрх баригчдын үнэн мөнийг илчилсэн ажээ.

Алексей Навальный гэж хэн бэ?

"Путиний хамгаас айдаг хүн Навальный" хэмээн Wallstreet сонинд бичиж байжээ.Доорх баримтуудаас үзвэл үнэн байх магадлалтай аж. 

• Навальный 2011 онд Москва хотод болсон бослогод оролцсон хэмээн анх удаа 15 хоног шоронд саатуулагдаж байв.
• 2012 оны ОХУ-ын Ерөнхийлөгчийн сонгуулийн дараахан Владимир Путин Навальныйгийн өнгөрсөн үеийн талаар эрүүгийн хэрэг үүсгэж, шалгах тушаал Мөрдөн байцаах хороонд өгч байв.
• Дараа жил нь мөн Навалтныйд Киров хотод мөнгө завшсан байж магадгүй хэргээр таван жилийн хорих ял өгч байжээ. Тэгсэн ч түүнийг дээд шүүхээс баталгаа хангалтгүй хэмээн ялыг түдгэлзүүлсэн байна. Хууль зүйн асуудалд орооцолдсон ч 2013 оны Москва хотын захирагчийн сонгуульд нэр дэвшиж, хоёрдугаар байранд орсон бөгөөд Москва хотын захирагчаар Владимир Путиний холбоотон Сергей Собянин ялалт байгуулжээ.
• Навальныйг Кремлийн эсрэг дуу хоолойгоо өргөхөд Владимир Путин ОХУ-ын төрийн бүх хэвлэл мэдээллээр түүнийг гаргахыг хориглосон байна. Ийнхүү тэрбээр цахим ертөнцөд дуу хоолойгоо илэрхийлэхээс өөр аргагүй болжээ.
• Тэрбээр 2016 оны арванхоёрдугаар сараас Ерөнхийлөгчийн сонгуульд өрсөлдөх кампанит ажлаа эхлүүлсэн боловч түүнийг дэмжигчид удаа дараа улс төрийн авилгын хэрэгт буруутгагдан төрийн албанд ажиллах эрхийг нь хураасан байна. 
• 2017 онд Москва хотод авилгын эсрэг жагсаал болоход Навалыный тэргүүтэй 1000 гаруй хүнийг баривчилжээ. Түүнийг 15 хоноод сулласан байна.
• 2017 оны дөрөвдүгээр санд Навальный халдлагад өртөж, нүдэндээ ногоон өнгөтэй химийн будгаар цохиулсны улмаас гэмтэл авч байв. Түүний гадаад руу гарах эрхийг нь хассан байсан ч Кремлиний хүний эрхийн зөвлөл  Испанид очиж эмчлүүлэх эрх олгосон байна.
• 2018 онд түүнийг ахин 30 хоногийн хугацаатай баривчилжээ. Үүнийг Европын хүний эрхийн шүүх "Түүний эрхийг зөрчиж байна" хэмээн үзсэн ч тодорхой арга хэмжээ авсангүй.
• 2019 онд түүнийг ОХУ-ын хуулийн зөрчсөн хэмээн ахин шоронд хийсэн ба шоронд байх хугацаандаа хорт бодист хордож байжээ. Түүний эсрэг талынхан хордуулсан хэмээн үзэж байв.
• 2019 оны наймдугаар сарын 20-нд онгоцоор нисэхээсээ өмнө цай ууснаас хойш бие нь муудаж, онгоцыг яаралтай газардуулж, эмнэлэгт хүргэжээ. Түүнийг онгоцны буудалд  хордуулсан хэмээн Навальный туслах мэдээлсэн байна. Тэрбээр ХБНГУ явж эмчлүүлсэн ба гурван долоо хоногийн дараа комоос сэргэхэд эмч нар новичокоор хордуулсан байна хэмээн нотолсон юм.
• Хэдэн сарын дараа ОХУ-ын аюулгүй байдлын албаны ажилтан хэмээх нэгэн "Би хордуулаагүй. Гэхдээ ул мөрийг нь цэвэрлэх ажилд оролцсон" хэмээх утасны яриаг олон нийтэд ил гаргахад Москвагийн шүүх "Энэ бичлэг хуурамч" хэмээн  хэргийг хэрэгсэхгүй болгожээ. Навалньныйд түүнийг баривчилна гэж анхааруулсан ч эх орондоо эргэж ирсэн ба 30 хоногийн хорих ял түүнд ногдуулжээ.

Ийнхүү Алексей Навальныйг дэмжих жагсаалын үеэр улсын хэмжээнд 3300 гаруй хүнийг баривчлаад буй бөгөөд зөвхөн Москва хотод 855 хүнийг саатуулаад байна.

Оросын эрх баригчид Засгийн газраас жагсагчдад тусгай зөвшөөрөл өгөөгүйгээс гадна эсэргүүцлийн жагсаал хийхийг хоригложээ. Жагсаал болохоос өмнө Навальныйтай холбоотой хүмүүсийг шоронд хорих болон торгох шийтгэл ногдуулаад байжээ. Мөн жагсаал цуглааныг сурталчилсан хувь хүн болон хэвлэл мэдээллийг татан буулгах тушаал өгөөд байгаа аж.  Ийнхүү жагсаалын үеэр болсон үйл явдлыг тоймлон хүргэж байна.

Орон нутгийн цагаар бямба гарагийн өглөөний 08:19 цагт:

"ОХУ-ын Владивосток хотод 2000 хүн эсэргүүцлээ илэрхийлэв" хэмээн "Новая газета"- мэдээлсэн бөгөөд цагдаа нар хүчээр тараасан байна.

08:20 цагт:

Хабаровск хотод арав гаруй хүн эсэргүүцэл үзүүлэхэд цагдаа нар хананд шахаж хүч үзүүлсэн хэмээн мэдээлэв.

09:10 цагт:

Сибирийн Эрхүү хотод 500 гаруй хүн эсэргүүцлээ илэрхийлжээ.

09:29 цагт

Хойд Сибирийн -50 хэмийн хүйтэнд хүмүүс жагсав.

09:30 цагт: 

Сибирийн Чита хотод 300 орчим хүн эсэргүүцлээ үзүүлж, дөрвөн хүн саатуулагдсаны нэг нь насанд хүрээгүй хүүхэд байжээ.

10:00 цагт:

ОХУ-ын 13 хотод эсэргүүцлийн цуглаан болж хамгийн багадаа 48 хүнийг саатуулаад байна хэмээн цагдаагийн албанаас мэдээллээ.

10:30 цагт:

Сибирьт өрнөсөн эсэргүүцэл үргэлжилж, Новосибирск, Томск, Улан-Үд болон Кемерово хотод эсэргүүцлийн жагсаал боллоо.

11:00 цагт:

Владивосток хотын үймээнийг дарсан бөгөөд "Нэг хүнийг цагдаагийн фургон руу ухаангүй байхад нь чирсэн" хэмээн "Новая газета" мэдээлжээ.

11:30 цагт:

ОХУ-ын Сибирийн нутагт үргэлжилсэн эсэргүүцлийн жагсаалд дор хаяж 15 мянган хүн оролцож байна. Одоогийн байдлаар 25 хотод 174 хүнийг баривчлаад байна гэв.

11:50 цагт:

Москва дахь жагсаал хоёр цагийн дараа эхэлнэ хэмээн мэдээлжээ.

12:00 цагт:

ОХУ-ын дөрөв дэх том хот болох Екатеринбург хотод 5000-11000 гаруй хүн -30 хэмийн хүйтэнд жагсжээ.

12:28 цагт:

Хоёр цагийн дараа жагсаал эхлэх ёстой байсан ч Москва хотын төвд, Пушкиний талбайд үймээн үүсэж, жагсаалыг тарааж, хүмүүсийг саатуулжээ. Уг мэдээллийн дагуу хэдэн зуун эсэргүүцэгчид цугласан байжээ.

13:42 цагт:

Москва хотод саатуулагдсан хүмүүс дунд насан хүрээгүй хүүхэд байсан төдийгүй тик ток аппликейшнээр эсэргүүцэлд уриалан дуудсан хүмүүсийг тэмдэглэж авсан бөгөөд их дээд сургуулийн оюутнуудыг жагсвал сургуулиас нь хөөнө хэмээн сүрдүүлэв.

13:48 цагт:

Екатеринбург хотод жагсагчид, цагдаа нарын дунд мөргөлдөөн гарч офицерууд цасан бөмбөг, утаат гранат эсэргүүцэгчид рүү хаясан хэмээн мэдээлэв.

15:00 цагт:

Навальныйн эхнэр Юлия Навальная Москвагийн талбайд ирж эсэргүүцлээ илэрхийллээ.

15:05 цагт:

Санкт Петербург хотод жагссан хүмүүсийг баривчилж эхэллээ.

15:10 цагт:

Жагсагчид "Эрх чөлөө", "Огцор", "Путин бол хулгайч", "Навальныйг сулла" "Нэг нь нийтийн төлөө, нийт нь нэгний төлөө" хэмээн лоозон барьж эсэргүүцлээ илэрхийлэв. Москва хот дахь жагсагчид нэмэгдэж Пушкиний хөшөөнөөс Кремлийн хажуу дахь Манежийн талбай хүртэл алхлаа.

15:26 цагт:

Навальныйн эхнэр Юлия Навальная цагдаагийн машинд саатуулагдсан зургаа цахим ертөнцөд байршуулав.

16:03 цагт:

Москва хотод жагсагчид болон цагдаа нарын хооронд гарсан мөргөлдөөн хяналтаас гарав.

16:37цагт:

Москва хотод жагсагчид дор хаяж 40 мянган хүн байна хэмээн мэдээлжээ. Жагсагчид, цагдаа нарын мөргөлдөөн үргэлжилсээр байна.

16:54 цагт:

Москвагийн жагсаалын үеэр дор хаяж дөрвөн сэтгүүлч гэмтжээ.

17:23цагт:

Цагдаа нар жагсагчдыг санамсаргүй байдлаар сонгон саатуулж эхэлжээ. Үүнийг эсэргүүцэн тэмцэгчид цагдаа нар руу цасан бөмбөг шидэж эхэллээ.

17:33 цагт:

ОХУ-ын эрх баригчид АНУ-ын элчин сайдын яамыг Навальныйн жагсаалыг зохион байгуулахад оролцсон хэмээн тайлбар шаарджээ.

17:59 цагт:

Улс даяар өрнөсөн жагсаалын үеэр 40 орчим цагдаа шархадсан хэмээв.

18:22 цагт:

Эсэргүүцэгчид албаны машинууд руу дайрсан бөгөөд нэгэн жолоочийн нүд нь бэртэж, эмнэлэгт хүргэгдэв. Цагдаа нар зэвсэггүй, тайван жагсаж буй олон руу дайрч буй бичлэг цацагдлаа.

18:45 цагт.

Навальныйн эхнэрийг сулласан бөгөөд зарим эсэргүүцэгч Навальный хоригдсон шоронг чиглэн алхлаа.

18:53 цагт:

Нэгэн эмэгтэй цагдаагаас "Та яагаад баривчилж байгаа юм бэ" хэмээх асуултад гэдэс рүү нь цохиж, зам дээр цохисон бичлэг цацагдаж, эмэгтэйг түргэний машинаар эмнэлэгт хүргэжээ.  

19:15 цагт:

Алексей Навальныйг дэмжих баг дараа долоо хоногт ахин жагсана хэмээн мэдээлэв.

19:49 цагт:

Эсэргүүцэгчид Навальный хоригдож буй шоронгийн үүдэнд хүрч иржээ. Тэмцлээ үргэлжлүүлжээ.

Эх сурвалж: moscowtimes