Их Британи, Умард Ирландын Нэгдсэн Хаант Улсын Гадаад хэргийн сайд Дэвид Камерон Монгол Улсад айлчлахаар болжээ. Тухайлбал, Гадаад хэргийн сайд Дэвид Камерон нь Төв Азийн орнуудаар хийж буй айлчлалынхаа хүрээнд Тажикистан, Киргизстан, Узбекистан, Туркменистан, Казахстан, Монгол Улсад айлчлахаар болсон тухай Их Британийн Гадаад хэргийн яамнаас мэдэгдсэн байна. Харин Монголд хийх албан ёсны айлчлал нь дөрөвдүгээр сарын 25-26-ны өдөр болох бөгөөд Их Британийн Гадаад хэргийн яамны мэдээллээр Гадаад хэргийн сайд Дэвид Камерон бүс нутгийн удирдагчидтай уулзаж, терроризмын эсрэг тэмцэх, уур амьсгалын өөрчлөлттэй холбоотой асуудал ярилцаж байгаа аж.

Ташрамд дурдахад, өдгөө 59 настай Их Британи, Умард Ирландын Нэгдсэн Хаант Улсын Гадаад хэргийн сайд Дэвид Камерон 2010-2016 оны хооронд Ерөнхий сайдын албан тушаалд томилогдон ажиллаж байсан туршлагатай бөгөөд “Брексит”-ийн санал хураалтыг эхлүүлж байсан дэлхийн нөлөө бүхий улстөрчдийн нэг юм байна.