-ТАЛИЙГААЧИЙН ОРСОН ГЕМОДИАЛИЗЫН АППАРАТААР ЦУС СЭЛБҮҮЛСЭН ИРГЭД, ЗАДЛАН ШИНЖИЛГЭЭ ХИЙСЭН ЭМЧ НАР ДОХ-ЫН ХАЛДВАР АВСАН ЭСЭХИЙГ НУУЦАЛЖ БАЙНА-

    ДОХ-ын халдвар авсан иргэн Цэргийн төв эмнэлэгт нас барсан харамсалтай хэрэг гарчээ. Ноцтой нь, талийгаачийг ДОХ-ын халдвар тээгч гэдгийг нь мэдэлгүй архины хордлогын эмчилгээ хийж, бөөрний диализ аппарат залгаж, задлан шинжилгээ хийсэн байж болзошгүй гэнэ. Энэ хэрэг Үндэсний аюулгүй байдлын зөвлөлийн хэмжээнд яригдаж, ихэд нууцалж байгаа бололтой.

Талийгаач Б Цэргийн төв эмнэлэгт аравдугаар сарын 5-нд  хүргэгдэж очсон. Ингээд арав хоногийн дараа буюу аравдугаар сарын 15-нд нас баржээ.

        Ар гэрийнхэн нь эмнэлгийн байгууллагад “Манай хүн эдгэшгүй хүнд өвчтэй. Сүүлийн өдрүүдэд архи согтууруулах ундааны зүйл хэрэглэсэн. Биеийн байдал нь муудаад байна” хэмээн дуудлага өгч, Цэргийн төв эмнэлгийн Хордлогын тасагт хүргэгджээ. Ингээд Цэргийн төв эмнэлгийн эмч нар хордлогын эсрэг эмчилгээ хийж, бөөрний дутагдал гэсэн онош тогтоосон гэнэ. Ийм ноцтой хэрэг гарч, олон хүнийг эрсдэлд оруулсан байж болзошгүй байна. 

ДОХ-ЫН ХАЛДВАРТАЙ ИРГЭНИЙ ХЭРЭГЛЭСЭН БӨӨРНИЙ ДИАЛАЗ АППАРАТАД ХЭДЭН ХҮН ОРСОН НЬ ТОДОРХОЙГҮЙ

        Талийгаачаас цусны дэлгэрэнгүй шинжилгээ авсан ч ДОХ-ын эсрэг шинжилгээ аваагүй. Учир нь, талийгаачийн ар гэрээс ч халдвартай гэдгийг нь хэлээгүй учраас эмнэлгийнхэн хайхрамжгүй хандсан байж болзошгүй. Ингээд халдварт өвчтэй гэдгийг нь мэдэлгүй бөөрний тасагт шилжүүлж, диализ аппаратад оруулж, цус сэлбэж эхэлсэн гэнэ.

         Эх сурвалжийн бидэнд өгч буй мэдээллээр “Талийгаачид бөөрний аппаратад залгаж, эмчилгээ хийсэн. ДОХ-ын халдвар бэлгийн зам болон цусаар дамжина. ДОХ-той хүний цусыг сэлбэсэн аппаратаараа бөөрний өвчтэй хүмүүст эмчилгээ хийсэн болж таарна. Талийгаачийн хэрэглэсэн аппаратыг дамжуулж хэрэглэсэн иргэд халдвар авсан байж болзошгүй нөхцөл байдал илрээд байгаа юм билээ. Иргэдээс нарийн шинжилгээ авч, эмнэлгийн хяналтад байлгаж байгаа гэсэн. Талийгаачийн орсон бөөрний диализ аппаратад хэчнээн хүн орсон нь тодорхойгүй. Энэ бол маш ноцтой асуудал” гэв.

Цэргийн төв эмнэлгийн Бөөр судлалын тасаг нь гемодиализын гурван аппаратаар бөөр орлуулах эмчилгээг хийдэг аж. Үүнийх нь нэг байжээ.

ТАЛИЙГААЧИД ЗАДЛАН ШИНЖИЛГЭЭ ХИЙСЭН ЭМЧ НАР ДОХ-ЫН ХАЛДВАР АВСАН УУ

        Бүр ноцтой нь, талийгаачид задлан шинжилгээ хийжээ. ДОХ-ын халдвартай гэдгийг нь мэдэлгүй задлан шинжилгээ хийсэн эмч нар ч халдвар авсан байж болзошгүй гэнэ.

Хамгийн анх 1992 онд Монгол Улсад ДОХ-той хүний тохиолдол бүртгэгдсэн байдаг. Өнгөрсөн оны байдлаар 367 хүн ХДХВ-ийн халдвартай нь оношлогдож, үүнээс нь 63 нь нас бараад байгаа юм. Мөн нас барсан 63 хүний 35 нь ДОХ-ын шалтгаантай байгаа аж.

Хэрэв Цэргийн төв эмнэлгийн Бөөрний тасагт хэвтэн эмчлүүлж байсан иргэд, талийгаачид задлан шинжилгээ хийсэн эмч нараас халдвар илэрвэл Үндэсний аюулгүй байдалд нөлөөлөх хэмжээний ноцтой асуудал болно. Иймээс бид холбогдох албаныхнаас дараах мэдээллийг авлаа.

Ж.БАЙГАЛМАА: ДОХ-ЫН ХАЛДВАРТАЙ ИРГЭН ЦЭРГИЙН ТӨВ ЭМНЭЛЭГТ НАС БАРСАН ТАЛААР МЭДЭЭГҮЙ БАЙНА

       -ХӨСҮТ-ийн дарга Ж.Байгалмаа: ДОХ-ын халдвартай бүх өвчтөн манай эмнэлэгт бүртгэлтэй, хяналтад байдаг. Эм тариа, эмчилгээгээ хийлгэдэг. Гэхдээ Цэргийн төв эмнэлэгт ДОХ-ын халдвартай хүн нас барсан гэдэг мэдээллийг надад өгөөгүй байна. ДОХ-той хүмүүс бусад эрхтэн нь өвдсөн тохиолдолд эмнэлгийн тусламж авна. Өөрийн харьяа дүүрэг, хувийн, хувьсгалын бүх эмнэлэгт үзүүлэх эрхтэй. Гэхдээ тухайн өвчтөн нь үйлчилгээ үзүүлж байгаа эмч, эмнэлгийн байгууллагад “Би ДОХ-ын халдвартай” гэдгээ хэлэх ёстой. Мэс засалд орох зэрэг үйлчилгээ авахаар бол манай эмнэлгээс баг гарч, тусламж үзүүлдэг. Энэ талаар ХӨСҮТ-ийн ДОХ/БЗДХ-ын тандалт судалгааны албаны тодруулах нь зүйтэй.  

Ж.ДАВААЛХАМ: БИ АЖЛААСАА ЧӨЛӨӨЛӨГДСӨН УЧРААС МЭДЭЭЛЭЛ ӨГӨХГҮЙ

       -ХӨСҮТ-ийн ДОХ/БЗДХ-ын тандалт судалгааны албаны дарга Ж.Даваалхам: Би ажлаа хүлээлгэж өгсөн учраас мэдээлэл өгөх боломжгүй. Ямар шалтгааны улмаас ингэж байгааг мэдэхгүй, ямартай ч чөлөөлөх тушаал гарсан байна. Цэргийн төв эмнэлэгт ДОХ-ын халдвартай хүн барсныг мэдэхгүй.

Б.ЭНХ-ОД: МАНАЙ ЭМНЭЛЭГТ ДОХ-ЫН ХАЛДВАРТАЙ ХҮН НАС БАРААГҮЙ

          -Цэргийн төв эмнэлгийн дарга Б.Энх-Од: Манай эмнэлэг гемодиализын гурван  аппаратаар  бөөр орлуулах эмчилгээг хийдэг. Гэхдээ одоогийн байдлаар хоёр нь эвдэрч, нэгээр нь эмчилгээ хийж байгаа. Манай эмнэлэгт ДОХ-ын халдвартай иргэн нас барсан хүн байхгүй. Гемодиализын аппаратад орж байгаа иргэдэд нэг удаагийн хэрэглүүр хэрэглэдэг. Гэхдээ би энэ талаар тодруулж байгаа хэлье.

Албаныхны тайлбарлаж буйгаар “ДОХ-ын халдвартай иргэн Цэргийн төв эмнэлэгт нас бараагүй” гэнэ. Нас барах нь бүү хэл эмнэлэгт хүргэгдэж ирээгүй, бөөрний аппаратад ороогүй хэмээн ихэд нууцалж байлаа.

Т.МӨНХСАЙХАН: ЦЭРГИЙН ТӨВ ЭМНЭЛЭГТ ДОХ-ЫН ХАЛДВАРТАЙ ИРГЭН НАС БАРСАН НЬ ҮНЭН

Харин бид энэ асуудлаар Эрүүл мэндийн сайд Т.Мөнхсайханаас тодрууллаа.

          Т.Мөнхсайхан “Цэргийн төв эмнэлэгт ДОХ-ын халдвартай иргэн нас барсан нь үнэн юм байна лээ. Би энэ асуудлаар холбогдох хүмүүсээс нь тодруулсан. Харин зохих журмын дагуу шаардлагатай арга хэмжээ авсан гэж тайлбарласан. Ном, журмынх нь дагуу эмчилгээ хийсэн гэсэн үг. Хэрэв ДОХ-ын халдвартай гэдгийг нь мэдээгүй, олон хүнийг эрсдэлд оруулсан байвал зохих журмын дагуу арга хэмжээ авна. Бид шаардлагатай бол шалгалтын ажиллагаа явуулна” гэлээ.

            Ямартай ч Цэргийн төв эмнэлэгт ДОХ-ын халдвартай иргэн нас барсныг салбарын сайд нь хүлээн зөвшөөрч байгаа аж. Харин олон иргэний эрүүл мэндэд эрсдэл учруулсан эсэхийг шалгаж үзнэ гэнэ.

Үргэлжлэл бий.