Монгол Улсын Засгийн газрын ээлжит хуралдаан өнөөдөр болж өндөрлөлөө. Засгийн газрын хуралдаанаас гарсан шийдвэрийн талаар Шадар сайд С.Амарсайхан мэдээлэл өгөв.

                        Тэрбээр “Засгийн газрын ээлжит хуралдаанаар үндэсний гамшигтай тэмцэх байгууллагын чадавхийг дээшлүүлэх, онцгой байдлын байгууллагын алба хаагчдын тоног төхөөрөмж, техник хэрэгслийг нэмэгдүүлэх асуудлаар хэлэлцэж энэ чиглэлд 25 тэрбум төгрөг төсөвт тусгахаар тогтлоо. Мөн онцгой байдлын байгууллагын чадавхийг дээшлүүлэх чиглэлээр эрэн хайх, аврах, гал түймэртэй тэмцэх алба, албан хаагчдын тоог нэмэгдүүлэхээр болов. Хэдий үе үеийн Засгийн газар энэ салбарт шаардлагатай хөрөнгө оруулалтыг нэмж, хүний нөөцийг нэмэгдүүлж байсан ч хангалтгүй байна. Одоогоор онцгой байдлын байгууллагад зайлшгүй байх шаардлагатай эрэн хайх, аврах, гал унтраах алба хаагчдын тоо 60 хувь дутуу, шаардлагатай тоног төхөөрөмж, техник хэрэгсэл 40 хувь дутуу байна. Түүнчлэн онцгой байдлын алба хаагчдын 10 хүн тутмын гурав нь л стандартын шаардлага хангасан хувцастай байгаа.

                        Тиймээс Ерөнхий сайдын зүгээс онцгой байдлын байгууллагад шаардлагатай төсвийг нэмэгдүүлж, зохицуулах чиглэл өгсөн. Эхний ээлжид 25 тэрбум төгрөгөөр онцгой байдлын алба хаагчдын хувцас, хэрэгслийг олон улсын стандартад нийцүүлж, гамшгийн үед ажиллах гал унтраадаг дрон, робот худалдан авахаар болсон. Мөн болзошгүй эрсдэлийн үед онцгой байдлын байгууллагаас иргэдэд зарлан мэдээлэх чиглэлд 30 сая төгрөгийн төсөл хэрэгжүүлэхээр боллоо” гэв.