Монгол Улсын Засгийн газрын ээлжит хуралдаан өнөөдөр болж өндөрлөлөө.

Тус хуралдаанаас гарсан шийдвэрийн талаар Засгийн газрын Хэрэг эрхлэх газрын дарга Д.Амарбаясгалан “Өнөөдрийн Засгийн газрын хуралдаанаар уламжлалт мал аж ахуйд тулгамдаж буй асуудлаар хуулийн төсөл боловсруулж, УИХ-д өргөн барихаар боллоо.

Цаг уур, уур амьсгалын өөрчлөлттэй холбоотой бэлчээрийн мал ах ахуй хүнд байдалд байгаа нь орсныг өнгөрсөн өвөл болсон цас, зудын нөхцөл байдлаас тод харагдсан. Ялангуяа ган, зудын давтамж урт хугацаатай байсан бол одоо 2-3 жилийн давтамжтай болж ойртсон. Ган, зудын аюул ингэж өөрчлөгдсөнөөр малчид болон Монголын уламжлалт мал аж ахуйд томоохон бэрхшээл тулгарч байна гэж үзсэн.

                         Тэгвэл уг асуудлаар Ерөнхий сайдын зүгээс үүрэг чиглэл өгсний дагуу хуулийн төсөл боловсруулахаар боллоо. Уг хуулийн төслөөр малчдын амьжиргааг дээшлүүлэх, тогтвортой орлогын эх үүсвэртэй болох, монгол малын чанарыг дээшлүүлэх, тооноос илүү чанарт анхаарсан хөдөө аж ахуйн бий болгох нөхцөл, боломжийг бүрдүүлэх зорилготой байна” гэв.