Монголын урлагийн давтагдашгүй содон дуучин Төмөрийн Ариунаа гавьяат "Зүрх асна" тоглотоороо тэсрэлт хийлээ, энэ бямба гарагт. Үргэлж л бэлтгэл сургуулилт, тайз, гэрэл, дуулалтаа бусдаас өндөр түвшинд байлгаж, ер бусын их эрч хүч, гал цогоор өөрийгөө дүүргэн цэнэглэж явдаг энэ эмэгтэй 16 настай танхил охин байхаасаа урлагт хөл тавьсан байдаг.

      Өдгөө яг 40 жилийн дөрөө жийж, "Уран бүтээлч хүн гэж ийм байдаг юм аа" гэдгийг ханатал харуулж, өндөр түвшний тоглолтыг ард түмэндээ үзүүллээ. Дуулалт бүр нь уртай, дуу бүхэн нь хит гэдэг ч даган дуулах сонсогчдоос нь илт. Тэд хамтдаа "Чи минь мөрөөдөл минь билээ" гэж хайртай хүнээ хүсэн мөрөөдөж, "Хайрыг минь чи сонс" хэмээн хайртай хүндээ хайраа сонсгож, "Нандин учрал минь 100 жилдээ ганцхан хань минь" гэж ханьдаа зориулж, "Хорвоог дүүргэж дэргэд байгаарай" гэж шивнэнэ.  Мөн үггүй мордсон нэгнийг үгүйлж, зүүдний ханхүүтэй ярилцаж, шөнө дундын бүжигт уригдаж, чамтай бас чамгүй өдрүүдийн тухай сэтгэл доргитол дуулна.

     Ийнхүү хайр, хань, учрал, уяралын олон сайхан дууг зүрх сэтгэлийн өрөө тасалгаа бүрээр эгшиглүүлж, түүгээр олон ч хүн хөглөгдөж, тэтгэгдэж өнөөдрийг хүрсэн байдаг. Т.Ариунааг сонсоод уйлдаг, тайвширдаг, санан үгүйлдэг, сайн сайханд итгэдэг, гэгэлзэн догдолдог, гэрэлтэн дэлгэрдэг, учран хайрладаг, уяран хөглөгддөг. Т.Ариунаа ч өөрөө хүний сэтгэлийн голд зогсож байгаад тайзаа засдаг. Дунд нь зогсоод дүүрэн дүрэлзэн асаж чаддаг эмэгтэй. Ийм халуун гал, дулаан эрчим, дундрашгүй цэнэг, давтагдашгүй дуулалт Монголын урлагт бий нь гарцаагүй Т.Ариунаа юм.

     Тэгэхээр түүнгүйгээр рок попын урлагийг төсөөлөх боломжгүй. Тэр дурласан, хайрласан бүсгүйгээс гадна үл таних эмэгтэйн дуу хоолойг ч хүргэн дуулдаг. Эмэгтэйчүүдийн доторх ертөнцийг дуугаараа илчилж, эмнэж, нээж чаддаг. Тэр ээж, аав, эх орон, нарны хаан хүүхдүүдээ ч хайрлан, талын монгол айлыг ч эгшиглүүлж, аргадан гуйж, хайрлан энэрч дуулдаг. Ерээд он бол түүний дөнгөж урган нахиалж, удаа ч үгүй дэлгэрэн мандаж, уулгалан дагуулж байсан үе. Стиль имиж, дуулалтын хэв маяг, клип, тоглолт гээд цөм шинэ, бүгд ондоо. Турьхан биетэй галзуу эрч хүчтэй эмэгтэй ёстой ямар ч дуу, ямар ч тоглолтыг өөр түвшинд үзүүлэхэд бэлэн зогссон бөгөөд дуулсан дуу бүхнээ хит болгож чадаж байв. Тэгж эхэлсэн тэр өдгөө ч тэсэрсээр, тэмүүлсээр, гал цогоор өрдсөөр.

      Тийм ээ, тэр ямагт үндсэн хэв маягийг эвдэж, өөр байж, ондоог барьдаг уран бүтээлч. Тэр хэзээ ч даган дуурайдаггүй, дагуулагч, дүнсийж үймрээгүй, дүүрэн эрч хүч, дандаа л зүрхэндээ гал зөөж, түүнийгээ асааж, бусдыг ч бас дуу хоолой, дуулалтаараа асааж, ундрааж явдаг дуучин. Хэчнээн хүн түүний дуунд тэнхрээ бол, хэд нь эдгээ бол, ямархан нь уяран догдолж, хэн гэгч нь итгэл зориг ороо бол. Ямар ч л байсан өвдсөнд эм, шантарсанд итгэл, шаналсанд хүч, уйтгарт баяр өгдөг нь гарцаагүй. Сэтгэлд тогтож, хөвж үлддэг шидэт үгс, зөөлөн аялгуу түүний дуунуудынх. Ингээд л тэр өөр, тэр ондоо. Тэр давтагдашгүй, цор ганц. Зүрх ассан үдшийг монголчууд мартахгүй, зүрх асаасан дуучингаа харин бид үргэлж хайрлана. Тийм ээ, та бол Монголын урлагийн Төмөрийн Ариунаа.