Авхаалжтай л даа, “OI Entertainment”-ийн Б.Болорчулуун. Ёстой нөгөө “Энэ нээрээ элдэвтэй нөхөр шүү” гэдэг шиг л энэ цагийн иртэй залуу уран бүтээлчдийн нэг тэр яах аргагүй мөн. Донж маяг, төрх, илэрхийлэл ондоо, ондоо. Дүрүүд нь ч ийм л болохоор монголчууд, ялангуяа хүүхэд, залуус эл уран бүтээлчид хайртай байдаг биз ээ.

         “OI Entertainment” гэх нэгэн үеийн шижигнэсэн залуусын “тэсэлгээ” кино урлагт байгаа онож байгаа. “Хүсэл” уран сайхны киноноос эхлэн хамтдаа хийсэн бүтээлүүд нь үзэгчдийн хайр, талархлыг хүртэж, үзэгчид жүжигчдийг нь “Манай тэр, энэ” гээд хэдийнэ дотно танил шигээ ярьдаг болоод цөөнгүй жил болж байна. Тэр дундаа Б.Болорчулууны хамгийн сүүлд бүтээсэн “No Rules” олон ангит киноны Билэгийн дүр үзэгчдийг жигшээж, зэвүүцүүлж, бүр суудлаас нь өндөлзүүлж чадаж байгаа. Үзэгчид киноны эхний ангиас л Билэгийг ярьж, “Тэр нээрээ үнэхээр зэвүүн шүү. Болорчулуун яаж ингэж хувирч чадав аа” хэмээн, энэ яриа одоо ч өрнөсөөр байна. Гэхдээ тэр зүгээр нэг хурц араншин, ширүүн характертай тоглолт үзүүлсэнгүй. Үнэхээр зэвүүцэм, жихүүцэм, хачин муухай түрэмгий зан, харгис хэрцгий нэгэн “болж” хувирч чадсан. Бидний дунд тийм хүн амьдарч байгаа мэт тэр дүрээ бүтээж чадсан. Ер нь бидний дунд Билэг олон бий. Тийм учраас л хүмүүст тэр хэрцгий догшин хийгээд зальхай ааш араншин, үйл хөдлөл нь илүүтэй хүрээд, шархируулаад, үзэн ядуулаад байгаа хэрэг шүү дээ. Энэ нь нөгөө талаар уран бүтээлчийн дүрийн маш сайн судалгаа, эрэл, хөдөлмөрйбилээ. Тэр дүрээ бодит байлгахын тулд зөвхөн жүжиглэх бус ингэж хөдөлмөрлөдөг гэсэн үг. Уг киноны хоёрдугаар бүлэг яг энэ өдрүүдэд үзэгчдийг байлдан дагуулж байгаа тул Билэг ямархан хүнээр дуусахыг одоогоор таашгүй.

      Юутай ч үргэлж зөөлөн, тусархуу, дурлалт залуу, хаягдаж үлдсэн өрөвдөлтэй нэгэн тэргүүтэй эерэг дүрийн эзэн байсан тэр Билэгийн дүрээр үзэгчдэд мартагдахааргүй, хаана ч таарсан Билэг л харагдахаар болж чадлаа. Уран бүтээлч хүний хувьд энэ бол том амжилт.

ӨМНӨ НЬ ТЭР ДЭГГҮЙ МОЖУЛА Л БАЙЛАА

       Тэр “Мөрөөдлийн театр”-ын жүжигчин болохоосоо өмнө уран бүтээлийн “Mount” гэх хамтлагт ажиллаж байж. Гэхдээ үзэгчид түүнтэй “Мөрөөдлийн театр”-ын “Миний нууц хүү”, “Амьдрал өөрөө бэлэг”, “Тэр чинь би”, “Хайртай бол эргэж хараарай” зэрэг тайзны бүтээлээр нь илүүтэй танилцсан байх. Тэр дундаа “Миний нууц хүү” жүжгийн дэггүй Можулагийн дүрээр бүр илүү мэддэг болсон биз ээ. Эрх танхи, дураараа хүүгийн дүрийг эвтэйхэн гаргаж байсан тэр дараа нь “Хөтөч”, “Аз жаргалын эрэлд” зэрэг киногоор өөрийгөө “Ийм хэмжээний жүжигчин шүү” хэмээн кино продюсерууд болон үзэгчдэд харуулж чадсан. Эндээс түүний кино урлагийн замнал эхэлсэн гэж хэлэхэд хэтийдсэн болохгүй болов уу. Учир нь, тэрбээр тайз, дэлгэцийн уран бүтээлийг илүү мэргэжлийн түвшинд хийх, бүтээх зорилгоор гадаад руу мэргэжил дээшлүүлэх сургуульд явж, “хоосонгүй” ирсэн нь энэ юм. Хоосонгүй гэдгийн баталгаа нь, “Хүсэл”, “Гайхамшигт ертөнц” тэргүүтэй нэг ангит, “Галзуу дурла”, “No Rules” олон ангит уран сайхны кино юм. Өөрөөр хэлбэл, Можула хүү өсөж, том болжээ. Тэр тусмаа мэргэжлийн салбартаа эрийн цээнд хүрчээ.