Улаанбаатар хотод тарваган тахал өвчний тохиолдол бүртгэгдсэн талаар ЗСӨТ-өөс мэдээлээд байна. Тодруулбал, тарваган тахал илэрсэн иргэнийг ХӨСҮТ-д тусгаарлан, эмчилгээ хийж эхэлсэн байна. Мөн өвчтөний нэгдүгээр хавьтлын таван хүнийг тусгаарлаж, урьдчилан сэргийлэх эмчилгээ эхлүүлээд байгаа аж. Тухайн иргэн нь Хэнтий аймгийн Баян-Адарга, Биндэр сумаар зорчиж Улаанбаатар хотод иржээ.

Тарваган тахал болох нь шинжилгээгээр батлагдсан тул зорчсон аймаг, суманд хөл хорио тогтоох, тандалтын арга хэмжээ хийгдэж байна. Энэ талаар Биндэр сумын ЗДТГ-аас мэдээлэхдээ “Биндэр сумын Уйлант гэдэг газар тарваган тахлын тохиолдолд бүртгэгдсэн нь үнэн. Тахал батлагдсан учраас сумын Онцгой комисс хуралдаж, наймдугаар сарын 8-ны 15:00 цагаас сумаас орох, гарах хөдөлгөөнийг тодорхойгүй хугацаагаар бүрэн хязгаарлаж байна” гэжээ.