Улаанбаатар хотод тарваган тахал өвчний тохиолдол бүртгэгдсэн талаар ЗСӨТ-өөс мэдээлээд байна. Тодруулбал, тарваган тахал илэрсэн иргэнийг ХӨСҮТ-д тусгаарлан, эмчилгээ хийж эхэлсэн байна. Мөн өвчтөний нэгдүгээр хавьтлын таван хүнийг тусгаарлаж, урьдчилан сэргийлэх эмчилгээ эхлүүлээд байгаа аж. Тухайн иргэн нь Хэнтий аймгийн Баян-Адарга сумаас Улаанбаатар хотод зорчиж иржээ.

     Энэ талаар Хэнтий аймгийн Зооноз өвчин судлалын үндэсний төвийн дарга Ц.Гэрэлмаагаас тодрууллаа. Тэрбээр “50 настай эрэгтэй тарваган тахлаар өвчилсөн нь шинжилгээгээр тогтоогдсон. Тухайн иргэн нь Хэнтий аймгийн Биндэр, Баян-Адарга сумын нутгаар дамжиж, өчигдөр Улаанбаатар хотод очиж, ХӨСҮТ-д үзүүлсэн байна. Одоогоор иргэний биеийн байдал хүндэвтэр, бөөлжсөн өгүүлэмжтэй эмчлэгдэж байна. Тарваган тахлаар өвдсөн иргэний нэгдүгээр хавьтал нь 12, хоёрдугаар хавьтал нь зургаа хүн байна. Асуумж судалгаагаар Биндэр суманд нэгдүгээр хавьтлын гурван хүн байгаа. Хавьтал болсон иргэдийг тусгаарлаж, тандалт хийж байна. Тарваган тахлаар өвдсөн эрэгтэй Хэнтий аймгийн Баян-Адарга сумаас тарвага худалдан авч, Биндэр сумын айлд чанаж идсэн гэж мэдүүлсэн. Гэхдээ мэдээллээ баттай хэлэхгүй, нууцлаад байгаа. Яг одоо аймгийн Онцгой комисс хуралдах гэж байна” гэв.

Тарваган тахал өвснөөс урьдчилан сэргийлэх зөвлөмж:

Хууль тогтоомжид зааснаар тарвага агнах, тарваганы гаралтай түүхий эдийг худалдаалах, худалдан авах, тээвэрлэхгүй байх;

Тарваганы дотор эрхтэн, махыг хэрэглэхгүй, гэртээ хадгалахгүй, хот, суурин газарт тээвэрлэж оруулахгүй байх;

Тарвага болон мэрэгч амьтны бөөс, бүүрэгт хазуулахаас сэргийлэх;

Тарвагатай харьцсан, бөөс бүүрэгт хазуулсан, тарваганы арьс өвчсөн, мах эвдсэн болон идсэний дараа өндөр халуурах, толгой өвдөх, дотор эвгүйрхэх, нүүр нүд улайх, бүх бие, булчин өвдөх зэрэг шинж  тэмдэг илэрвэл эрүүл мэндийн байгууллагад яаралтай утсаар дуудлага өгнө үү.