Говь-Алтай аймгийн Засаг дарга О.Амгаланбаатар цагдаагийн албан хаагчийн шаардлагыг биелүүлэхээс татгалзаж, зугтсан талаарх мэдээлэл хэвлэл мэдээллийн хэрэгслээр цацагдаад байна. Тодруулбал, наймдугаар сарын 5-ны өдөр тэрбээр Говь-Алтайгаас Улаанбаатар чиглэлд зорчиж яваад, Ховд аймгийн Дарви сумын нутагт дэвсгэрт цагдаагийн албан хаагчтай маргалдаж, шардлагыг нь биелүүлэхээс татгалзаж, “Намайг танихгүй байна уу. Шалгуулахгүй” зэргээр хэл амаар доромжилжээ.

Дарви сумын цагдаагийн хэсгийн төлөөлөгчийн шаардлагыг биелүүлээгүй учраас Говь-Алтай аймгийн Засаг дарга О.Амгаланбаатарыг цагдаагийн байгууллагаас шалгаж эхэлсэн байна.

Энэ талаар ЦЕГ-ын Хэвлэл мэдээллийн төвөөс тодруулахад “Ийм хэрэг бүртгэгдсэн нь үнэн. Говь-Алтай аймгийн Засаг дарга О.Амгаланбаатарыг Ховд аймгийн цагдаагийн газраас шалгаж байгаа” гэлээ.

Эх сурвалжийн мэдээлснээр О.Амгаланбаатар утсаа авахгүй байгаа бөгөөд цагдаагийн албан хаагчид дуудаж, тайлбар мэдүүлэг авахаар эрэн хайж байгаа гэх. Бид О.Амгаланбаатар Засаг даргатай холбогдож, энэ талаар тодруулах гэсэн боловч тэрбээр утсаа салгаж, “Мэдээлэл өгөх боломжгүй. Мессэж бичээрэй” хэмээн зурвас илгээсэн юм.