Ерөнхий сайд Л.Оюун-Эрдэнэ АНУ-ын дэд ерөнхийлөгч Камала Харрисын урилгаар Вашингтон хотод албан айлчлал хийж байна. Айлчлалын эхний өдөр буюу өнөөдөр АНУ-ын дэд ерөнхийлөгч Камала Харрис Монгол Улсын Ерөнхий сайд Л.Оюун-Эрдэнийг Цагаан ордонд хүлээн авч уулзаж, албан ёсны хэлэлцээ хийсэн. Ингэхдээ талууд Агаарын тээврийн тухай хэлэлцээр байгуулж, Монгол Улс, АНУ-ын хооронд шууд нислэгтэй болох болжээ. Тэгвэл АНУ руу шууд нислэгтэй болсноор Монгол Улсад ямар боломж нээгдэж байгааг сонирхуулъя.

-ГАДНЫН ХӨРӨНГӨ ОРУУЛАГЧДЫН АНХААРЛЫГ ТАТНА-

                    Өнгөрсөн 2022 онд Монгол АНУ-тай 276 сая ам.долларын худалдаа хийснээс 9.9 сая ам.долларын экспорт, 266.1 сая ам.долларын импорт хийжээ. Харин 2023 оны эхний хагасын байдлаар хоёр орны худалдааны эргэлт 157 сая ам.долларт хүрээд байгаа бөгөөд өнгөрсөн оны мөн үетэй харьцуулахад том үр дүн гарч, өссөн үзүүлэлт. Тэгвэл Монгол, АНУ-ын хооронд шууд нислэгтэй болсноор гаднын хөрөнгө оруулагчдын анхаарлыг татах гэнэ. “Quora” сайтын олон улсын аялагчдын группт шууд нислэгтэй орнуудын давуу талыг дурдахдаа “Хөрөнгө оруулагчдын анхаарлыг сайн татдаг” гэсэн байна. Тодруулбал, хөрөнгө оруулагч, бизнесменүүд нислэг дамжиж цаг алдаж очих газраас илүүтэй шууд нислэгтэй, цагаа хэмнэх газрыг сонгодог аж.

-МОНГОЛД ИРЭХ ЖУУЛЧДЫН ТОО ЭРС НЭМЭГДЭЖ, ЭДИЙН ЗАСАГТ ҮР ӨГӨӨЖ ӨГНӨ-

                    Шууд нислэгт нислэг дамжиж байхдаа ачаа, тээшээ алдах, нислэгээсээ хоцрох эрсдэлгүй зэрэг олон давуу тал бий. Түүний нэг нь зорчигчдын тав тух. “TTRA” судалгааны байгууллагаас жуулчдын дунд судалгаа явуулж, дийлэнх жуулчин дамжиж нисдэг газраас илүүтэй шууд нислэгтэй эсэхийг нь судалж, аялдаг гэнэ. Улмаар Монгол, АНУ-ын хооронд шууд нислэгтэй болох зөвхөн АНУ-ын иргэд гэлтгүй бусад улсын жуулчдыг татах боломж болно. Жуулчид Монголоор аялж, худалдан авалт хийх нь улсын ам.долларын нөөцөд эерэг нөлөө үзүүлнэ. Цаашилбал, төгрөгийн ам.доллартой харьцах ханшийн чангатгаж, эдийн засгийн өсөлтөд нөлөө үзүүлэх юм байна.

Мөн Ерөнхий сайд Л.Оюун-Эрдэнэ АНУ-ын дэд ерөнхийлөгч Камала Харристай хийсэн Агаарын тээврийн хэлэлцээрийн хүрээнд хоёр орны хооронд шууд нислэг үйлдэх “Бойнг-787” онгоцыг хамгийн боломжит үнээр худалдан авахаар болсон. Монгол Улс, АНУ-ын хооронд шууд нислэг 2024 оны II хагасаас эхэлнэ.