ХЭНТИЙН НААДАМ  ГАДНЫНХАНД ХАЛТАЙ БАЙНА УУ

       Эзэн Чингис хааны өлгий нутаг болох Хэнтий аймаг байгуулагдсаны түүхт 100 жилийн ой тохиож, төрийн түшээд болон олны танил эрхмүүд хүрэлцэн ирсэн.Нээлтийн арга хэмжээг Мөрөөдлийн театрын захирал, жүжигчин Г.Алтаншагай, Фантастик продакшны жүжигчин Ж.Алтаншагай нар зохион байгуулсан.  Тоглолтод "Чингис хаан" хамтлагийн ахлагч, Ардын жүжигчин, дуучин Д.Жаргалсайхан, дуучин Н.Ундрал, Төрийн соёрхолт "Хурд" хамтлаг, Төрийн соёрхолт дуучин Д.Болд, дуучин Батух, С.Бичүү, реппер Thunder, Jason, Desant, Babar, Roockie, Seryoja, Young Mo'G  зэрэг олны хайр хүндэтгэлийг хүлээсэн уран бүтээлчид оролцсон. Олон нийт нээлтийн арга хэмжээг үзээд сэтгэл ханамж өндөр ёстой л өргөн дэлгэр сайхан наадам  болж байна гэж ам сайтай байлаа.

    Гэвч Хэнтийн наадам өөр нутгаас ирж, наадамд оролцож буй уяач, бөхчүүдэд халтай байгаа нь хэд хэдэн баримтаас харагдаж байна.

            Тухайлбал, Улсын баяр наадамд үзүүрлэсэн улсын гарьд  Ц.Бямба-Отгон Хэнтий аймгийн наадамд сумын заан Р.Алтаннарангаар гурав давсан. Гэтэл цэцийн шийдвэрээр түүнийг унасанд тооцжээ. Бичлэгт  сумын зааны тохой түрүүлж газарт хүрсэн нь харагдана.  Улсын гарьд  Ц.Бямба-Отгон цэцийн шийдвэрийн дараа тахимаа өгөөгүй юм. Монгол бөхий дүрмийг зөрчсөн  энэ  шийдвэр нь олон нийтийн бухимдлыг ихэд хүргэж байгаа билээ.

Б.ОТГОНСЭЛЭНГЭ: ӨӨР АЙМГИЙН НЭРТЭЙ МОРИЙГ ХАСААД БАЙНА

        Мөн их насны морьдын уралдаанд түрүүлсэн Хөвсгөл аймгийн уяач Б.Отгонсэлэнгийн ажнайг тодорхойгүй шалтгаанаар хасжээ. Морины комиссын гишүүд   яагаад хассан талаараа тодорхой тайлбарыг одоог болтол хэлээгүй байгаа аж.  Нүд нь сохор, чих нь дүлий мэт  ямар ч тайлбар өгөхгүй  байгаа нь Хэнтий аймгийн наадам гаднынханд халтай байгааг бататгах мэт.

      Уг хурдан ажнай улсын баяр наадамд түрүүлж байлаа.  Уяач Б.Отгонсэлэнгэ  энэ талаараа хэвлэлд  "Хэний нутагт уралдаж байгаагаа мэдэж байна уу. Морио аваад зайл" зэргээр доромжилж, морины комиссынхон зугтаж байна. Хурдан морины уралдааны дээд хоёр нас нь автомашины шагналтай юм байна. Морины комиссынх нь хүмүүс түүнээс болж хассан юм уу. Тод манлай уяачийн морийг Хэнтий аймгийн хорих ангийн даргын нэр дээр мордуулаад, тэр нь аман хүзүүнд орж иртэл миний морийг хасуулсан. Өөрийн комиссын нэр дээр байгаа морийг уралдуулаад өөр аймгийн нэртэй морийг хасаад байна. Орон нутгаас ирээд наадаж болохгүй болчихсон юм байна. Нэг номерын пайз нь байгаа юм чинь, мориныхоо цолыг нь дуудуулна, машин тэргээ хорихын дарга нь авна биз”  гэх тайлбарыг  өгчээ.

   Мөн өсвөрийн сур харваанд 26 онож, түрүүлсэн охиныг шагналт байраас хасжээ. Сурын харваа дууссаны дараа нутгийнхаа  хүүхдүүд дунд нэмэлт сур харвуулж, шалгаруулжээ.

    Энэ талаар харваач охины аав Т.Мөнгөнбаяр өөрийн цахим хуудастаа “Охин маань Хэнтий аймгийн  100 жилийн  ойн наадмын өсвөрийн сур харваанд түрүүлжээ. Гэтэл явсных нь дараа нутгийн хүүхдүүдээрээ найман сум нэмж тавиулаад, шагналт байруудаа тодруулсан байна” гэжээ.

            “Нутгийнхаа наадамд өөрсдөө түрүүлэх “учиртай” юм бол бусад аймгуудаас бүртгэхгүй баймаар юм” гэж наадамчин олон бухимдалтай байна гэнэ.  Мөн “Хэнтий аймгийн  наадмын шагнал өндөр учир нутгийнхандаа өгөх гэж байна” гэж ч  эх сурвалжууд ярьж байна. 

ТҮҮХЭН ОЙН НААДМААРАА ТҮМЭН ОЛНОО ТАЛЦУУЛЖ, ТҮРҮҮ БАЙР БУЛААЛЦАЛДАХ НЬ ЮУНЫ УЧИР ВЭ, ХЭНТИЙЧҮҮДЭЭ...