Нийслэлийн Засаг даргын Нэгдүгээр орлогч Р.Чингисийг үүрэгт ажлаас нь чөлөөлөхөөр болсон талаар бид өмнө мэдээлсэн билээ. Тодруулбал,  түүнийг Дотоодын цэргийн 805 дугаар ангийн захирагчаар томилохоор болсон тул Нэгдүгээр орлогчийн ажлаас нь чөлөөлсөн гэх. Мөн “Зайсан хилл” цогцолборт болсон “Камертон” хамтлагийн тоглолттой холбоотойгоор түүнд хариуцлага хүлээлгэж, үүрэгт ажлаас нь чөлөөлсөн гэх мэдээлэл ч бий.

Бид энэ талаар Нийслэлийн Засаг даргын Нэгдүгээр орлогч асан, хурандаа Р.Чингисээс тодрууллаа. Тэрбээр “Одоогийн байдлаар хуралд сууж байгаа учир мэдээлэл өгөхгүй. Дотоодын цэргийн 805 дугаар ангийн захирагчаар томилогдох тухай мэдээлэл надад алга. Энэ тухай ойлголт алга” хэмээлээ.

Р.ЧИНГИС ГЭЖ ХЭН БЭ

-Р.Чингис Цагдаагийн байгууллагад эрүүгийн төлөөлөгчөөс эхлээд ЦЕГ-ын дарга хүртэлх албан тушаалыг 30 гаруй жил хашсан.

-Эрүүгийн цагдаагийн газарт эрүүгийн төлөөлөгч, ахлах төлөөлөгч, Эдийн засгийн гэмт хэрэгтэй тэмцэх хэлтсийн даргаар ажиллаж байсан.

-ЗХУ-ын ДЯЯ-ны Академид гүйцэтгэх ажлын чиглэлээр суралцаж, хуульч, эрх зүйч мэргэжил эзэмшсэн.

-2002-2004 онд АНУ-ын Колорадогийн их сургуульд хууль зүйн магистрын зэрэг хамгаалсан.

-2012 онд ЦЕГ-ын дэд дарга, 2014-2016 онд ЦЕГ-ын даргаар ажиллаж байжээ.

Р.Чингисийг Ерөнхий сайд Л.Оюун-Эрдэнэтэй нэг баг, ойр харилцаатай гэх яриа улс төрийн хүрээнд байдаг. Тэрбээр Замын цагдаагийн дарга асан, цагдаагийн хурандаа Г.Ринчиндоржийн хүү юм. Мөн түүнийг Гадаад харилцааны сайд Ц.Мөнх-Оргилын хуурай дүү, түүгээрээ “МСS”-тэй холбогддог гэж улс төрийн хүрээнийхэн ярьдаг.