“ЮНЕСКО”-гийн дэлхийн өвийн хорооны 48 дугаар чуулганд Монгол Улсын төлөөлөгчид оролцож, Эгийн голын усан цахилгаан станцын төслийн үнэлгээ, судалгааны ажлын явцыг танилцуулжээ.  “ЮНЕСКО”-гийн дэлхийн өвийн хорооны 48 дугаар чуулган 2026 оны долдугаар сарын 19–29-ний өдрүүдэд Бүгд Найрамдах Солонгос Улсын Пусан хотноо зохион байгуулагдсан байна. Байгал нуурын дэлхийн өвийн хадгалалт, хамгаалалттай холбоотой асуудлын хүрээнд тус чуулганд Эрчим хүчний яам, “ЮНЕСКО”-гийн дэргэдэх Монгол Улсын Байнгын төлөөлөгчийн газар, Шинжлэх ухааны академи, Засгийн газрын хэрэгжүүлэгч агентлаг-Усны газар, “Эгийн голын усан цахилгаан станц” ТӨХХК болон төслийн Байгаль орчин, нийгмийн нөлөөллийн үнэлгээний гүйцэтгэгч “EACC” ХХК-ийн төлөөлөл оролцжээ.

     Чуулганы үеэр Монгол Улсын төлөөлөгчид Эгийн голын усан цахилгаан станц төслийн хэрэгжилтийн явц, Дэлхийн өвийн хорооны 46, 47 дугаар чуулганы шийдвэрийн мөрөөр хэрэгжүүлж буй арга хэмжээ, төслийн талаарх Монгол Улсын эрчим хүчний бодлого, төлөвлөлт, байр суурийг танилцуулж, холбогдох талуудтай санал солилцов. Мөн Монгол Улсын төлөөлөгчид Олон улсын байгаль хамгаалах холбоо (ОУБХХ)-ны Дэлхийн өвийн асуудал хариуцсан ахлах хөтөлбөрийн зохицуулагч Мизуки Мурай, ахлах хөтөлбөрийн ажилтан Кэти Зишка тэргүүтэй төлөөлөгчидтэй уулзалт хийсэн байна.

    Уулзалтаар Эгийн голын УЦС төслийн техник, эдийн засгийн үндэслэл, байгаль орчин, нийгмийн нөлөөллийн үнэлгээ, Монгол, Оросын хамтарсан экосистемийн судалгааны явц, хоёр улсын хамтын ажиллагаа болон Сэлэнгэ мөрний сав газарт Монгол Улсаас хэрэгжүүлж буй байгаль орчны урт хугацааны мониторингийн ажлын талаар мэдээлэл өгч, санал солилцжээ. ОУБХХ-ны төлөөлөгчид Дэлхийн өвийн хүрээнд нөлөөллийн үнэлгээ хийх аргачлалын дагуу боловсруулж буй Эгийн голын УЦС төслийн Байгаль орчин, нийгмийн нөлөөллийн үнэлгээ болон ОХУ-тай хамтран хэрэгжүүлж буй судалгааны ажлын явцтай танилцаж, эерэгээр үнэлэв.

     Мөн төслийн БОННҮ-ний тайлангийн төслийг эцэслэхээс өмнө ЮНЕСКО-гийн Дэлхийн өвийн төв болон ОУБХХ-д танилцуулж, санал, зөвлөмж авах нь үр дүнтэй болохыг зөвлөжээ. Улмаар Байгал нуурын хадгалалт, хамгаалалтын асуудлыг энэ удаагийн чуулганаар хэлэлцэхгүй, Дэлхийн өвийн хорооны 49 дүгээр чуулганаар хэлэлцүүлэхээр шийдвэрлэсэн байна. Мөн 2026 оны наймдугаар сард “ЮНЕСКО”-гийн Дэлхийн өвийн төв болон ОУБХХ-ны шинжээчид Дэлхийн өвд бүртгэгдсэн Байгал нуурын хадгалалт, хамгаалалтад реактив мониторингийн үнэлгээ хийхээр ОХУ-д ажиллах юм байна.