УОК өчигдөр буюу дөрөвдүгээр сарын 16-нд цахимаар хуралдлаа. Хуралдаанаар коронавирусийн нөхцөл байдалтай холбогдуулан эмнэлгийн тусламж үйлчилгээг өргөтгөх зорилгоор  АШУҮИС-ийн “Монгол-Японы эмнэлэг”,  Төрийн тусгай албан хаагчдын нэгдсэн Эмнэлэг болон бусад эмнэлгийн орыг чөлөөлж, коронавирусийн халдвараар өвчилсөн хүндэвтэр, хүнд өвчтөнийг эмчлэх асуудлыг шийдвэрлэх тухай Эрүүл мэндийн сайдын санал дэмжигдлээ.

Мөн халдвар ихээр тархаж, иргэдийн биеийн байдал хүндэрч, нас баралт нэмэгдэж буй учир гэрээр эмчлэгдэж байгаа иргэдийг эмнэлэг, тусгаарлах байранд татан авч эмчлэх нь зүйтэй гэдэгт комиссын гишүүд санал нэгдлээ. Иймд оюутны дотуур байр, сургуулийн байр, спортын заал, зочид буудлуудын орны тоон судалгааг УОК-ын шуурхай штабаас гаргасны дагуу бэлтгэж, эмнэлгийн тусламж үйлчилгээ үзүүлэх орчныг тухай бүрт бүрдүүлэхээр болов.

Мөн хурлын үеэр коронавирусийн эсрэг вакцины захиалга, татан авалтын талаарх улс орнуудтай хийж буй яриа хэлэлцээрийг эрчимжүүлж байгаа гэдгийг Гадаад харилцааны сайд мэдээллээ.