Нидерландын Амстердам хотод коронавирусийн шинэ журмыг эсэргүүцсэн жагсагчид, цагдаа нарын дунд мөргөлдөөн үүсжээ. Нидерландад 21:00-04:30 цагийн хооронд хөл хорио тогтоож, уг дэглэмийг зөрчсөн тохиолдолд 95 еврогийн торгууль ногдуулах аж. Нидерландад дэлхийн II дайнаас хойш анх удаа хөл хорио тогтоосон нь энэ. Шинэ дүрмийг пүрэв гарагийн орой баталсан бөгөөд хөл хориог эсэргүүцэн иргэд жагсжээ.  

Цагдаа нар жагсагчдын эсрэг нулимс асгаруулагч хий ашиглаж, харин зарим жагсагч цагдаа нарын эсрэг салют шидэж, дэлгүүр тонож, дэлгүүрийн цонх хагалсан хэрэг гарсан байна. Одоогоор цагдаа нар 100 гаруй босогчдыг баривчлаад байгаа аж.

Энэ тухай аюулгүй байдлын зөвлөлийн дарга Хуберт Брюльс “Ард түмний бухимдлыг ойлгож байна. Гэхдээ бид одоо л тэвчээртэй байж чадвал эрх чөлөөгөө эрт олж авна” хэмээжээ.

Нидерландад аравдугаар сараас хойш цэнгээний газар, зоогийн газруудыг хаасан бол, арванхоёрдугаар сараас барааны дэлгүүр, сургуулиудыг хаагаад буй аж. Мөн коронавирусийн шинэ хувилбараас үүдэн Өмнөд Африк, Их Британи тэргүүтэй хэд хэдэн улсад зорчих нислэгийг зогсоогоод байгаа билээ.

Нидерландад 944 мянган коронавирусийн батлагдсан тохиолдол бүртгэгдээд байгаа бөгөөд 13646 хүн вирусийн улмаас нас бараад байна.