АНУ, Монгол Улсын Засгийн газар 2012 оноос хамтран ажиллаж, АНУ-д хууль бусаар очсон Монголоос гаралтай археологийн болон түүх, соёлын үнэт зүйлсийг Монголд эргүүлэн авчирч байгаа. Тэгвэл хоёр орны Засгийн газар хоорондын хамтын ажиллагааны хүрээнд өнгөрсөн жил АНУ-аас үлэг гүрвэлийн 16 ховор олдворыг эх орондоо авчирсан. Монголд авчирсан үлэг гүрвэлийн олдворууд дунд Тарбозавр батаарын ховор олдвор багтаж байгааг холбогдох албанаас мэдэгдээд байгаа. Тэгвэл АНУ-аас авчирч, нийтэд үзүүлээгүй үлэг гүрвэлийн ховор олдворуудыг Эргэлт.мн мэдээллийн сайт онцлон танилцуулж байна.

ТАРБОЗАВР БАТААРЫН ХОЁР ОЛДВОР

Тираннозавртай ижил төрөл гэгддэг Цэрдийн галавын үеийн тарбозавр батаарын хоёр олдвор багтжээ. Тухайлбал, нэгийг нь Холливудын нэрт Николас Кэйж 2007 онд “The Beverly Hills Gallery I.M.” дуудлага худалдааны үеэр авсан байна. Харин нөгөө нь нэн ховорт тооцогдох тарбозавр батаарын гавлын яс байгаа гэнэ.

АЛИОРАМУСЫН БҮРЭН ЯС

Гаднын эрдэмтдийн дунд “Монгол” тираннозавр гэгддэг алиорамусын бүрэн ясыг Монголд авчирчээ. Алиорамус нь хэлбэр, хэмжээгээрээ тэмээн хяруултай төстэй бөгөөд Юрийн галавын үед хамаардаг. Уг үлэг гүрвэлийн талаарх судалгаа маш хомс байдаг бөгөөд Америкийн эрдэмтэд алиорамусын олдворыг Монгол руу буцаах болсныг эсэргүүцсэн талаар гаднын эх сурвалжууд мэдээлжээ.

ГАДРОКАВРЫН ГАВЛЫН ЯС

Өвсөн тэжээлтний ангид багтдаг нугасан хошуут гадрокаврын гавлын яс мөн багтжээ. Тус олдвор нь 70 орчим сая жилийн өмнөх үед хамаарч байгаа аж.

ҮЛЭГ ГҮРВЭЛИЙН ҮҮР, ӨНДӨГНҮҮД

АНУ-аас Монголд авчирсан 16 ховор олдворт үлэг гүрвэлийн хэд хэдэн үүр, өндөг багтсан талаар эх сурвалж мэдээллээ. Үүрэнд өвсөн тэжээлтний ангийн үлэг гүрвэлийн үүрнүүд багтсан бол өндөгнүүдийн судалгааны ажил дуусаагүй байсан бөгөөд Цэрдийн галавын үед хамааруулж үзэж байгаа юм байна.