“Эрүүл сүрьеэгүй ирээдүйн төлөө” төрийн бус байгууллагаас ерөнхий боловсролын сургуулийн сурагчдын дунд сүрьеэгийн эрт илрүүлэх, хавьтлын шинжилгээг зохион байгуулж байна. Энэ нь Глобаль сангийн дэмжлэгтэй ДОХ, сүрьеэгийн төслийн хүрээнд хийгдэж байгаа бөгөөд Эрүүл мэндийн яам болон Халдварт өвчин судлалын үндэсний төв, Сонгихайрхан дүүргийн сүрьеэгийн диспансерууд дэмжин ажиллаж байгаа аж.

Тус үзлэгийн эхний ээлжинд Сонгинохайрхан дүүргийн ерөнхий боловсролын сургуулийн сурагч хамрагдаж байгаа бөгөөд өнөөдрийн байдлаар нийт 1100 сурагч, 62 багш, ажилтан хамрагджээ. Үзлэгийн үр дүнд сүрьеэтэй байж болзошгүй 29 тохиолдлыг илрүүлж, сорил тавих, баталгаажуулах шинжилгээг давхар хийж, нарийн мэргэжлийн эмч нарын үзлэг хяналтад оруулсан байна.

Энэ талаар “Эрүүл сүрьеэгүй ирээдүйн төлөө” ТББ-ын тэргүүн, Клиникийн профессор М.Тунсаг “Цаашид ч гэсэн ерөнхий боловсролын сурагчдын сүрьеэгийн эрт илрүүлэг үзлэгт анхаарах хэрэгтэй. Учир нь өсвөр насны хүүхдүүдийг эрт илрүүлэх үзлэгт хамруулж, эмчлэх нь аливаа эрсдэлээс урьдчилан сэргийлэх бодит алхам юм. Сонгинохайрхан дүүргийн хувьд хүн ам, өвчлөл олонтой, алсагдмал байршилтай учир эмнэлгийн тусламж үйлчилгээг ойртуулах зорилгоор бид энэ удаагийн эрт илрүүлэх үзлэг хийж байна. Үзлэгийн дараа эмч нар нэгдсэн дүгнэлт хийнэ. Мөн өнөөдөр сэжигтэй гэсэн тохиолдлуудад тус дүүргийн сүрьеэгийн диспансераас сорил тавьж, баталгаажуулах шинжилгээнд хамрууллаа” гэв.

Харин Сүрьеэгийн эмч Ц.Загиржав “Сургуулиудад дижитал рентген аппаратын тусламжтай сүрьеэгийн эрт илрүүлэх үзлэг хийлээ. Энэ үеэр сүрьеэтэй байж болзошгүй гэж сонгосон хүүхдүүдэд сорил тавьж, шаардлагатай шинжилгээг хийж байна. Шинжилгээний хариу гарсны дараа хийх эмчилгээг дүүргийн диспансертай хамтран хийхээр болсон. Эрт илрүүлэх үзлэг хийснээр хүүхдийг сүрьеэгийн өвчлөлөөс урьдчилан сэргийлэх, өвдсөн тохиолдолд эрт эмчлэх, халдвар тархахаас урьдчилан сэргийлэх ач холбогдолтой юм” гэсэн юм.