Гэрийн даалгавар нь сурагчийн сурлагын амжилтад чухал үүрэгтэй байдаг. Зөвхөн багшийн өгсөн үүрэг даалгавар биш, харин хичээл дээр ойлгосон мэдлэгээ бататгах, бие дааж сэтгэх чадвараа хөгжүүлэх үнэт боломж юм. Гэсэн ч хийх зүйл их байх, анхаарал сарних, төлөвлөгөөгүй ажиллах зэрэг нь даалгавраа хойш тавих гол шалтгаан болдог. Тэгвэл гэрийн даалгавраа цагт нь, үр бүтээлтэй, төвлөрөлтэй гүйцэтгэхэд туслах долоон энгийн бөгөөд үр дүнтэй зөвлөмжийг хүргэж байна. Эдгээрийг өдөр тутмын дадал болгоход сурах үйл явц илүү хялбар, үр ашигтай болно.

Төлөвлөгөө гаргаж хэвших

      Хүүхэд юу хийхээ, хаанаас эхлэхээ мэдэхгүй бухимдаж цаашлаад даалгавар хийх хүсэлгүй болж эхэлдэг. Тиймээс эхлээд тухайн өдрийн хийх даалгавруудаа жагсааж бичвэл анхнаасаа цэгцтэй байх болно. Жишээ нь:

• Математик – №1–3 бодлого
• Монгол хэл – эх бичиж задлан шинжлэх
• Англи хэл – өдөрт 10 шинэ үг цээжлэх гэх мэт.

Ингээд тухайн даалгаварт ойролцоогоор хэдэн минут зарцуулах төлөв гарга. Хамгийн төвөгтэй, их цаг шаардсан хичээлийг эхэлж хийх нь зүйтэй. Өглөөний цагаар тархи хамгийн сайн ажилладаг тул төвлөрөл их шаардсан хичээлд ашиглавал тохиромжтой.

Зорилгоо тодорхой болго

       Зорилготой сурагч үргэлж илүү зохион байгуулалттай байдаг. Өдөр бүртээ жижиг ч гэсэн зорилго тавьж хэвших хэрэгтэй. “Өнөөдөр бүх хичээлээ бүрэн дуусгана” эсвэл “Математик дээрээ алдаагүй бодно” гэх мэт. Том даалгаврыг жижиг хэсэг болгон хувааж биелүүлж эхэлбэл илүү хялбар болно хэмээн багш нар зөвлөдөг. Тиймээс зорилго тавих нь сэтгэл зүйн хувьд өөрийгөө хянаж, урамтай сурахад тусална.

Анхаарлаа төвлөрүүлэх орчин бүрдүүлэх

       Даалгавар хийх орчин сурах үр дүнд шууд нөлөөлдөг. Утас, зурагт, компьютер, тоглоом гэх мэт анхаарал сарниулагч бүх зүйлсээс хол байж хэвших хэрэгтэй. Боломжтой бол чимээгүй, цэвэрхэн, гэрэл сайтай өрөөнд суугаарай. Ширээний ард зөв байрлалтай суух нь тархинд дохио өгч төвлөрөл сайжруулдаг. Хэрэв чимээгүй орчин олдохгүй байвал тайвшруулах аядуу хөгжим сонсож болно.

Помодоро аргыг ашиглах

      Помодоро арга нь дэлхий даяар хамгийн түгээмэл хэрэглэгддэг суралцах техник юм. Энэ аргаар 25 минут тасралтгүй ажиллаад, 5 минут завсарлана. Энэ үйлдлийг 4 удаа давтаад, 15–20 минут урт амралт авна. Энэхүү арга нь анхаарал сарнихаас сэргийлж, тархины ядаргааг багасгаж, ажлыг хойш тавих зуршлаас ангижрахад тусалдаг.

Ойлгож хийхийг зорь

       Зарим сурагч гэрийн даалгаврыг ойлгож хийхээс илүү хурдан дуусгах дээрээ илүү төвлөрдөг. Мэдээж ингэж хийсээр байвал огт мэдлэг болж үлдэхгүй. Даалгавар хийхийн өмнө тухайн сэдвийг дахин уншиж, ойлгох гэж хичээх хэрэгтэй. Ойлгоогүй зүйл байвал багш, ангийн найз, эсвэл интернэтээс тодруулж илүү чанартай хийж хэвших нь зүйтэй юм. YouTube, Wikipedia зэрэг эх сурвалжуудыг зөв ашиглавал илүү ойлгомжтой, баттай болж өгнө.

Завсарлага зөв авч сурах

         Тасралтгүй олон цаг сурах нь ядрал үүсгэж, төвлөрөл сулруулдаг. Иймд 40–50 минут тутамд 5–10 минут завсарлах нь зөв. Энэ хугацаанд босч алхах, цонхоор харж нүдээ амраах, ус уух, тайвширч суух зэрэг амралтын хэлбэр хэрэгтэй. Завсарлага бол алдагдсан цаг биш харин дараагийн ажлаа илүү үр дүнтэй хийх суурь юм.

Өөрийгөө урамшуулж сурах

           Даалгавраа амжилттай дуусгасан үед өөрийгөө шагнаж сурах нь дараагийн ажлаа хийх урам зориг өгдөг. Жишээ нь:

• дуртай амттанаа идэх
• кино үзэх, найзтайгаа уулзах гэх мэт.

Ингэснээр сурах үйл явцыг дарамт биш баяр баясгалантай, урамтай үйл ажиллагаа болгож хувиргана.

Гэрийн даалгавар бол сурагчийн хариуцлага, тууштай байдал, суралцах чадварыг хөгжүүлэх хамгийн сайн дадлага юм. Анхаарал төвлөрөл, урамшуулал бүхий ухаалаг хандлага нь амжилттай сурахын түлхүүр болдог.