Улсын Их Хурлын 2023 оны хаврын чуулганаар боловсролын суурь хуулиудыг шинэчилж, анх удаа Боловсролын үндэсний зөвлөл байгуулсан. Тус зөвлөлд төрийн болон төрийн бус байгууллага, их дээд сургууль, сурагч, оюутны төлөөлөл, иргэний нийгмийн байгууллага, судлаачид оролцдог.

Үндэсний зөвлөлийн хуралдаанаар “Сургуулийн өмнөх боловсрол” болон “Бага боловсрол”-ын сургалтын хөтөлбөрийн шинэчилсэн төслийг хэлэлцлээ.

Шинэчилсэн хөтөлбөрүүд нь хүүхдийн хөгжлийг дэмжих, чадамжид суурилсан, залгамж холбоо бүхий агуулгатай болж байгаа нь онцлог юм. Сургуулийн өмнөх боловсролын хөтөлбөрийг 30 хүртэл хувиар шинэчилж, багшийн ажилд дэмжлэг болох гарын авлага, дасгал ажлын дэвтэртэйгээр боловсруулжээ.

Харин бага боловсролын хөтөлбөрт тодорхой хэмжээний агуулгын өөрчлөлт орж, багш, сурагчдын хувьд шинэ нөхцөл байдалд дасан зохицох шаардлага үүсгэх ч хэрэгжилтийг зөвлөмж, удирдамжаар зохицуулах боломжтой гэж үзэж байна.

Хуралдаанаар  “Сургуулийн өмнөх боловсролын хөтөлбөр”-ийг батлахыг дэмжиж, “Бага боловсролын хөтөлбөр”-ийг цаашид сайжруулах чиглэл өгөв.

Эх сурвалж: Боловсролын яам