-Цаашид манайх нээлтэй даалгаврын санг хэрэгжүүлнэ- 

     Элсэлтийн ерөнхий шалгалтын талаар Боловсролын үнэлгээний төвөөс мэдээлэл хийлээ. Энэ үеэр БҮТ-ийн Даалгаврын сангийн хэлтсийн дарга С.Гэндэнжамц сэтгүүлчдийн асуултад хариулсан юм.

Элсэлтийн шалгалтын агуулгыг хүүхдүүд үзэж байсан 12 жилийн хичээлийн програмаас өөр, илүү хүнд, математикийн 1000 бодлогоос бараг орж ирээгүй гэж байсан. Энэ талаар тайлбар өгөөч?

     -Одоогоор бол шалгалтын блюпринтээсээ зөрсөн асуудал байхгүй. Гэхдээ хүүхдүүд тийм асуудал байгаа бол өргөдөл, гомдлоо өгөөд шалгалтынхаа үр дүнтэй танилцаад явж байгаа. Энэ жилийн элсэлтийн шалгалт нэлээд онцлогтой болсон. Математикийн жишиг 1000 бодлогыг нээлттэй байршуулсан. Цаашид манайх энэ нээлтэй даалгаврын санг хэрэгжүүлнэ. "Энэ жил ийм хүрээнд шалгалтын материал ирнэ шүү" гээд жишиг даалгавраа тавина.  Тэр бодлогуудыг бодоод сурчихсан хүүхдүүдэд бол өгөгдөл солих байдлаар шалгалтын материалаа хувилаад өгч байгаа. Сая математик дээр бид 40 бодлогыг сонгож аваад дөрвөн вариант болгож авсан. 

Шалгуулагч нар гар утастайгаа орсон тохиолдол энэ жил хэр их гарсан бэ?

     -Ерөнхийдөө жилийн жилд ийм зүйл ажиглагддаг. Шалгалтын төв байр руу нь нэвтэрч ороход металл илрүүлэгчээр илрүүлдэг. Энэ жилийн хувьд бол шалгалтын төв рүү долоон шалгуулагч утастайгаа ороод шалгалтын явцад хянагч багшид баригдаад дүн оноогоо тэглүүлсэн. 

Физикийн хэмжээст оноо 520 байж байгаад 480 болсон асуудал гарсан. Үүнээс болж шалгуулагч нар тухайн сургуулийнхаа босго оноонд хүрч чадахгүй болж байна шүү дээ?

     -Физикийн шалгалтын хоёр вариантын дээр нэг даалгавар дээр кЖ (киложоуль) гэх нэгж байхгүй байснаас болоод асуудал үүссэн. Үүн дээр тохируулга хийж бүх вариантын хүүхдүүдэд оноог бүтнээр нь өгсөн. Түүнээс болоод хэмжээст оноод тодорхой хэмжээний өөрчлөлт гарсан. Хэмжээст оноо автоматаар цаанаасаа гардаг. Ямар ч хүний оролцоо байхгүй. 

Нийгмийн сонгоны агуулга дээр үзэж байгаагүй, хэцүү сэдэв орж ирсэн. Энэ агуулга сурах бичгийн хаана байгаа вэ. Сонгоны хичээлээр орсон гэж байгаа ч хүүхдүүд сонгохоороо ч үзээгүй гэж байгаа?

     -Нийгмийн шалгалтын тэтгэврийн хувь тэнцүүлэх бодлого нийгэм судлалын сурах бичгийн аравдугаар ангийн 69 дүгээр хуудасны "Хүснэгт 3.2 Өндөр насны тэтгэврийн хэмжээ үүсэх үндэслэл, нэмэгдэл" гээд байгаа. Зарим хүүхэд энэ дээр байгаа гээд бусдадаа хэлж буй дүр зураг байсан. 

Элсэлтийн Шалгалтын даалгаврыг ямар хүмүүс боловсруулдаг юм бэ?

     -Манай байгууллагаас даалгаврыг хэрхэн боловсруулах талаар гадаадын болон дотоодын байгууллагуудтай хамтран ажилладаг. Хүүхдийн мэдлэг чадварыг бодитоор үнэлж даалгавар нь ямар өгөгдлөөр тавигддаг талаар мэргэжилтнүүдээ тогтмол сургадаг. Энэ шалгалтад 10 судлагдахуун бүрд 20 боловсруулагч, судлагдахуун дээр нэг эксперт буюу нийтдээ 30 хүн шалгалтын материал дээр ажилладаг. Сэдэв даалгавар боловсруулагч нарт сургалтын хөтөлбөр дээр тодорхой хэмжээгээр ажилласан, ерөнхий боловсролын, сургуульд хичээл заадаг, их, дээд сургуульд багшилдаг гэх мэт шаардлагууд тавьж байна. Мөн БҮТ-өөс зохион байгуулсан сургалтуудад хамрагдаж сертификат авсан бол давуу тал болно. Нэг судлагдахуун дээр ажиллах гурван хүн нь үүргээрээ ялгаатай. Нэг нь ерөнхий боловсролын сургуулийн багш, нэг нь олимпиад болон улсын тэмцээнд амжилт үзүүлсэн эсвэл их, дээд сургуулийн багш байдаг. Эксперт нь онолын хувьд алдаа бий эсэхийг хянадаг ба хөтөлбөр, сурах бичгийн талаар мэдлэгтэй, сурах бичиг боловсруулах багт ажиллаж байсан бол давуу талтай байдаг.