Сурах бичгийн агуулга, хөтөлбөр хоорондын агуулга уялдаа муутай, логик алдаатай, холбоос муу байна гэдэг дүгнэлтийг Боловсролын яамнаас гаргажээ. Тодруулбал, сурах бичгийн бодлого боловсруулдаг Боловсролын хүрээлэн, үе үеийн Боловсрол, шинжлэх ухааны сайд нар болон сурах бичиг зохиогчид хамтраад таван сарын хугацаанд 35 судлагдахууны 174 сурах бичигт судалгаа хийжээ.

Уг судалгаагаар хүүхдэд мэдлэг олгох сурах бичиг түлхүү байхаас олж авсан мэдлэгээ амьдралд хэрэгжүүлэх ур чадварыг хүүхдэд суулгах сурах бичиг цөөн байна гэж үзжээ. Мөн сурах бичгийн агуулга, хөтөлбөр хоорондын агуулга уялдаа муутай, логик алдаатай, холбоос муу байна гэдгийг тогтоосон байна.

Энэ талаар Боловсрол, шинжлэх ухааны сайд Л.Энх-Амгалан "Сурагчдын сурах бичиг Монгол хүүхдийн бие бялдар, нас, сэтгэхүйн онцлогт тохироогүй байхаас гадна ёс суртахуунд нь сөргөөр нөлөөлөх зүйлс ч байна. Иймд цаашид сурах бичгийг сайжруулна. Гэхдээ одоо хэрэгжиж буй хөтөлбөр дуустал шинэ сурах бичиг гаргахгүй. 2024 онд одоогийн хөтөлбөр дуусаж, шинэ хөтөлбөр зарлагдана. Шинэ хөтөлбөртэй сурах бичгийг уялдуулна. Сайд өөрчлөгдөх болгонд хөтөлбөр, сурах бичиг өөрчлөгддөг тогтолцооноос салах цаг болсон" гэв.