Хөдөлмөрийн чадамжаа 90 хувь алдсан иргэн Б.Цэдэнбал өнөөдөр мэдээлэл хийлээ.

Тэрбээр “Миний хоёр хөл өвдөгнөөс дээш тайралттай. Тиймээс хөдөлмөрийн чадамжаа 90 хувь алдсан гэх заалттайгаар группт хамаарагддаг. Дээрээс нь миний нэг гар ажиллагаагүй. Би гэр хороололд амьдардаг. Орон сууц хөтөлбөрт хамрагдах хүсэлтээ гурван ч удаа өгсөн. Гэвч байранд орж чадаагүй. Гэтэл хоёр хөл нь тайрагдсан хүн хөдөлмөрийн чадамжаа алдсан гээд орон сууц хөтөлбөрт хамрагдаж байна. Би барьцаж байгаа юм биш.

Нийслэлийн Засаг дарга Д.Сумъяабазарт орон сууц хөтөлбөрт хамрагдах хүсэлтэй байгаа талаараа хэлэхэд “Бүх байраа тараагаад дууссан. Танд өгөх байр алга” гэж хэлсэн

Хоёр хөл, нэг гараа алдсан надад гэр хороололд амьдрах хэцүү байна. Өвлийн хүйтэнд өтгөн, шингэнээ өөрөө зөөж, асгаж байна. Хүүхдүүдийг ажилдаа явахад би гэртээ ганцаараа үлддэг. Би улсад насаараа ажилласан. Группээс авдаг 350 мянган төгрөгөө түрээсэнд өгдөг. Асран хамгаалагчийн мөнгө гэж 90 мянган төгрөг авдаг. Би сард 130 мянган төгрөгөөр амьдарч байна. Нэг гараа группт тооцуулж, хөдөлмөрийн чадамжаа 100 хувь алдсан гэж дүгнүүлмээр байна” гэлээ.