Өнөөдөр Засгийн газрын ээлжит бус хуралдаанаар нийслэл дэх  хэд хэдэн газрыг нийтийн эзэмшилд авах шийдвэр гаргалаа. Нийслэлийн БЗД-ийн дөрөвдүгээр хороо, жанжин Ж.Лхагвасүрэнгийн гудамж-9, Г.К.Жуковын нэрэмжит талбайн хойд талд аж ахуйн нэгжүүдэд олгосон газар эзэмших эрхийг цуцлах, иргэдийн чөлөөт цагаа зөв боловсон өнгөрүүлэх нийтийн эдэлбэр газар болгон тохижуулахыг холбогдох албан тушаалтнуудад даалгалаа.

 

Мөн 2006-2015 онд нийслэл, дүүргийн Засаг даргын захирамжаар таван аж ахуйн нэгж, байгууллагад үйлчилгээний зориулалтаар газар эзэмших эрх олгосон байна. Тус газрыг  УИХ-ын гишүүн Ц.Анандбазарын эзэмшлийн “Ньютур сафарис”, “Мэргэ ван”, “Хүрээ инвест”, “Алхана трейд” зэрэг  компаниуд эзэмшихээр зөвшөөрөл гаргуулаад байсан бөгөөд ойр орчмын иргэд эсэргүүцэл гаргаж маргаан үүсгэснээр энэхүү арга хэмжээ авахад хүргэжээ.