Чойр хэсэглэлийн Наран Элгэн-Айраг өртөө хооронд өчигдөр буюу энэ сарын 6-ны шөнө их хэмжээний цас орж, салхи 37 м/сек хүртэл хүчтэй шуурсан. Үүний улмаас төмөр зам цасанд дарагдаж галт тэрэг, сэлгээний хөдөлгөөн түр зогсоход хүрээд байсан юм. Тэгвэл Чойр хэсэглэлийн төмөр замчид шуурхай ажиллаж галт тэрэгний хөдөлгөөнийг богино хугацаанд нээсэн байна.

Цаг агаарын онц аюултай үзэгдэл болж цасан шуурга болж болзошгүй тухай урьдчилсан сэрэмжлүүлэг мэдээг УБТЗ-ын Гамшгаас хамгаалах штабаас мэдэгдсэн байсан тул төмөр замчид бэлтгэлээ сайтар хангасан байжээ. Цар тахлын гамшгийн үед экспорт,импорт, орон нутгийн тээврийн дийлэнхийг төмөр замаар тээвэрлэж байгаа тул улс орон, ард иргэдэд нэн шаардлагатай ачаа барааг тасалдалгүй шуурхай тээвэрлэхийн төлөө төмөр замчид цар тахлын аюулыг сөрөн 24 цагаар ажиллаж байгаа юм.