Зэвсэгт хүчний жанжин штабаас цаг үеийн асуудалтай холбоотойгоор мэдээлэл хийлээ. Энэ үеэр ЗХЖШ-ын дарга Д.Ганзориг “Сүүлийн үед улс төрд өрнөж байгаа асуудлаар мэдээлэл хийх гэсэн юм. Зэвсэгт хүчний салбарыг улстөржүүлэх боллоо. Үүнээс өмнө би энэ салбарын талаар товч мэдээлэл хүргэе. Монгол Улсад орчин цагийн Зэвсэгт хүчин үүсэн байгуулагдсан цагаас хойших өдгөө 100 жилийнхээ түүхт ойгоо тэмдэглээд, дараагийн 100 жилийнхээ түүхийг бичээд явж байгаа их айл. Өнгөрсөн түүхэн хугацаанд Зэвсэгт хүчний нийт бие бүрэлдэхүүн эх орноо харийн түрэмгийлэгчдээс чөлөөлөх, ард олныг бичиг үсэгт сургах, ард түмний эрүүлийг хамгаалах, улс орондоо орчин үеийн соёл, боловсрол, шинжлэх ухаан, урлаг, анагаах ухааны ололтыг нэвтрүүлэх, аж үйлдвэрлэл, улс ардын аж ахуйг хөгжүүлэхэд үнэлж баршгүй хувь нэмэр оруулж, цаг ямагт манлайлсаар ирсэн салбар. Улс төрийн тоглолт хийж, эх орны батлан хамгаалах хүчин чадалтай холбоотой асуудлаар нээлттэй хэлэлцүүлэг хийх нь төрийн болон албаны нууцыг алдагдуулах үйлдэл хийсэн гэж үзэж байгаа. Зэвсэгт хүчинд жижиг асуудал гэж байдаггүй. Нийгмийн олон талт харилцаа, сайн муу тусгал цэргийн албыг тойроогүй. Улс төржиж болохгүй асуудал гэж бий. Энэ байдал зөрчигдвөл том төлөөсийг улс, үндэстнээрээ төлдөг гэх гашуун сургамжийг бид санаж явах ёстой. Эрхэм улс төрчид маань зэвсэгт хүчний үйл ажиллагааг улс төржүүлэхгүй байх нь үндэснтний аюулгүй байдалд нийцнэ. Зэвсэгт хүчин хариуцлагаас зугатаагүй. Эх орондоо өргөсөн тангарагтаа бид үнэнч байна. Хууль тогтоомжийн хүрээнд гаргасан шийдвэрийг зэвсэгт хүчин хүндэтгэн биелүүлнэ. Монгол Улсын Ерөнхийлөгч, Зэвсэгт хүчний ерөнхий командлагч зэвсэгт хүчний удирдах бүрэлдэхүүний сургалтан дээр цэргийн байгууллага, анги захирагч нарын удирдах бүрэлдэхүүнд хандаж хэлэхдээ цэргийн анги, цэргийн байгууллага, ала хаагчид улс төрөөс ангид байхыг захисан.

Монгол Улсын Ерөнхийлөгч, Зэвсэгт хүчний ерөнхий командлагч өчигдөр төрийн ордонд мэдэгдэл хийсний дараа ЗХЖШ-д хүрэлцэн ирсэн. Хүрэлцэн ирсний дараа гурван чиглэлээр үүрэг өгсөн. Үүнийг ард иргэдэд болж байгаа үйл явдлыг гуйвуулахгүйгээр хүргээсэй гэж хэлж байгаа юм.

Ерөнхийлөгчийн өгсөн чиглэлийн дагуу цэргийн албыг сайжруулах асуудлаар бий болсон ажлын хэсгийн цэргийн анги, байгууллагуудын үйл ажиллагааг шалгах, холбогдох шийдвэрийг гаргах асуудлаар ярьсан. Түүнчлэн Зэвсэгт хүчний 100 жилийн ойгоор хойшлуулсан арга хэмжээг хэзээ зохион байгуулах боломжтой талаар санал солилцсон. Мөн цэргийн нэгдсэн холбоотой хамааралтай үйл ажиллагааны талаар лавлаж асуусан. Түүнчлэн өчигдөр орой Ардын намын зүгээс хийсэн мэдэгдлийн дараа Монгол Улсын Ерөнхийлөгч ЗХЖШ-д хүрэлцэн ирснийг улс төрийн өнгө аястай болгон ярьж байгааг ЗХЖШ-ын зүгээс албан ёсоор няцааж байгааг мэдэгдье” гэлээ.

ШУУД ҮЗЭХ