Коронавирусийн PCR шинжилгээг хуурамчаар үйлдсэн гэх асуудалд нэр холбогдоод байгаа эмч нарын төлөөлөл мэдээлэл хийлээ. Энэ үеэр ХӨСҮТ-ийн үйлдвэрчний эвлэлийн хорооны дарга О.Баатарчулуун "ХӨСҮТ-д Тагнуулын ерөнхий газар, Эрүүгийн цагдаагийн албаны Эдийн засгийн гэмт хэрэгтэй тэмцэх албанаас хяналт шалгалт орсон нь үнэн. Энэ шалгалт орсноос хоёр хоногийн дараа livetv.mn телевизийн цахим хуудсанд “ХӨСҮТ-ийн эмч, мэргэжилтнүүд Монгол Улсыг коронавирусийн цар тахалд живүүлсэн үү” гэсэн хүндхэн гарчиг, тодорхой зохиол, жүжиглэлттэй нэвтрүүлэг гарсан. Энэ нэвтрүүлэг гарснаар цар тахлын голомтонд ажиллаж байгаа ХӨСҮТ-ийн эмч, мэргэжилтнүүдэд маш хүнд цохилт болсон. Мөн ард иргэд хүнд байдалд орсон. Бодит байдлыг илт гуйвуулсан, ХӨСҮТ-ийн эмч, эмнэлгийн ажилчдыг буруутгасан энэ нэвтрүүлэг гарснаар цар тахлын голомтод ажиллаж байгаа эмч, мэргэжилтнүүд энэ хоёр хоногийн хугацаанд сэтгэл санааны хүнд дарамтанд байлаа.

Өчигдөр миний бие PCR шинжилгээг хуурамчаар үйлдсэн гэх асуудалд нэр дурдагдсан эмч нартай уулзсан. Тэд “Ажилдаа төвлөрч чадахгүй, нойргүй хонож байна. Бид цар тахлын эсрэг хоёр жил тэмцэж, хийсэн ажлынхаа төлөө яагаад буруутгагдаж байгаа юм бэ. Бид ийм буруу юм хийх хүмүүс биш” гэж уйлаад хэлж байна.

Тэр хүмүүс мэдээлэл хийх байсан ч лабораторын ачаалал ихэссэнтэй холбоотойгоор ажлын байран дээрээ үлдсэн. Өчигдрөөс эхлэн шинжилгээний хариу хуурамчаар үйлддэг байсан нь нотлогдлоо гэх мэдээлэл гарч эхэлсэн. Тэр бүү хэл н.Сайханхүү эмчийг “21000 хүний шинжилгээг 80000 төгрөгөөг авч, 1.7 тэрбум төгрөг идсэн байна, Арай ч дээ” гэсэн мэдээллийг цахим сүлжээнд явуулж эхэллээ. Үүнийг бид зохион байгуулалттай, цар тахлын дэгдэлтийн бурууг ХӨСҮТ-ийн эмч, ажилчдад зохион байгуулалттайгаар гүтгэн, тохож байна гэж ойлгож байгаа. Бүх бурууг ХӨСҮТ рүү чихэж байгаа утга бүхий зураг хүртэл явагдсан.

Шинжилгээний хариуг хуурамчаар үйлдсэн гэдэг нь хуулийн байгууллагаар батлагдаагүй байхад шууд буруутай мэт мэдээллийг гаргаж байна. Үнэхээр буруутай бол бид хариуцлагаа хүлээе. Буруугүй нь тогтоогдвол бид нэр төрөө маш хурдан сэргээмээр байна.  

Бид цар тахлын голомтод 1.5 жил хоёргүй сэтгэлээр зүтгэж, ажиллаж ирсэн. Ингэж ажиллаж байхад төр засгийн гаргаж буй шийдвэрүүд зөв байсан уу. Халдварын тоо 1000 давж, хоногийн нас баралт нэмэгдэхээр байгаа бодит байдлыг ХӨСҮТ-ийн мэргэжилтнүүд УОК, Засгийн газарт нөхцөл байдал хүндрэх нь байна шүү гэж хэлж байсан. Хөл хориогоо зөв, үр дүнтэй байлга гэдгийг хэлсэн. Сайд нарын хажууд байгаа зөвлөх, эрдэмтдийн баг юу хийж байна вэ. Та нарын явуулж байгаа хариу арга хэмжээ буруу гэдгийг хэлмээр байна. Цар тахлын голомтод ажиллаж байгаа төрийн байгууллагын ажилчид нас барж, эмч, эмнэлгийн ажилтнууд олноороо халдвар авч эхэллээ. Ийм үед бие биенийгээ буруутгаж, чичлэхгүйгээр халдварын тархалтын эсрэг хамт баймаар байна. Цар тахлын голомтод ажиллаж байгаа эмч, ажилчдыг битгий буруутга. Бидэнд итгэл, урам хэрэгтэй байна” хэмээн ярилаа.