“Найрамдлын эрдэнэс” зусланд амарч байсан 322 хүүхэд хоолны хордлогод орж, эмнэлэгт хүргэгдсэн. Энэ талаар “Эрдэнэт үйлдвэр”-ийн дарга Г.Ёндон мэдээлэл өглөө.

Тэрбээр “Бүсийн оношилгооны төвд 45 хүүхэд, Эрдэнэт сувилалд 15 хүүхэд, “Эрдэнэс Медикал” эмнэлэгт 15 хүүхэд эмчлүүлж байна. Өчигдөр "Найрамдлын Эрдэнэс” зусланг бүрэн ариутгаж, эрүүл байсан 76 хүүхдийг тэнд үлдээсэн. Өглөөний байдлаар бүсийн эмнэлгийн халдварын тасагт 19 хүүхэд эмчлүүлж байгаа гэсэн мэдээлэл ирсэн. Нийт 58 хүнд шинж тэмдэг илэрснээс 18 нь үйлдвэрийн хүмүүжүүлэгч багш нар. Өчигдөр хүүхдүүдээс хоёр удаагийн асуумж авч, шинжилгээ хийж, тэднийг гурван хэсэгт хуваан эмнэлгийн тусламж үзүүлэх арга хэмжээ авсан.  Шуурхай штаб “Найрамдал Эрдэнэс” зуслан дээр хуралдаж, зовуурьтай байгаа хүүхдүүдийг бүсийн оношилгооны төвд, шинж тэмдэг илэрсэн 117 хүүхдийг сувилалд хуваарилсан. Хамгийн түрүүнд бид эцэг, эхчүүдээс уучлалт гуйж байна. Бидний зүгээс хамгийн түрүүнд яаралтай арга хэмжээ авч ажиллаж байна. Бүсийн оношилгооны төв болон халдвартын эмнэлгийн эмч нар хамтран ажиллаж байгаа. Холоос ирсэн эцэг, эхчүүдийн байр, нөхцөл байдалд анхаарч байна. Мөн маргааш явах ээлжийг цуцалсан бөгөөд вагон захиалсан эцэг, эхчүүдэд тасалбарын мөнгөө буцаан авах зөвлөмжийг хүргүүлсэн” гэв.