Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмын өдрүүдэд нийтийн тээврийн үйлчилгээг өргөтгөж, нийт 139 чиглэлд 975 тээврийн хэрэгсэл иргэдэд үйлчлэхээр болжээ. Тухайлбал долоодугаар сарын 11, 12-нд “Мишээл сити” болон “Дүнжингарав” худалдааны төвөөс Төв цэнгэлдэх хүрээлэн чиглэлд богино эргэлтийн хоёр чиглэлд нийт найман автобус үнэ төлбөргүй явна. Мөн Давааны зөрлөгөөс Хүй долоон худаг буюу морь барианы газар, авто зогсоолоос Хүй долоон худаг хүртэлх чиглэлд дөрвөн автобус 08:00-22:00 цагийн хооронд үнэ төлбөргүй үйлчилнэ. Харин галт тэргээр Давааны зөрлөг хүртэл зорчсон иргэд “БЭ:5 Давааны зөрлөг–Хүй долоон худаг” чиглэлд, авто зогсоол дээр автомашинаа тавьсан иргэд “БЭ:7” чиглэлд нийтийн тээврээр үргэлжлүүлэн зорчих боломжтой юм. Наадмын гол арга хэмжээ болох Хүй долоон худагт зориулж энэ сарын 10-13-ны хооронд тусгай чиглэлийн автобус үйлчилнэ. “Хүй:7-2 МУБИС-Хүй долоон худаг” чиглэлд тав, мөн долоодугаар сарын 11, 12-нд “Төв цэнгэлдэх-Хүй долоон худаг” чиглэлд 10 автобус иргэдэд үйлчлэх юм. Мөн энэ сарын 11, 12-ны өдрүүдэд Улаанбаатар хотын бүх суурьшлын бүсээс Төв цэнгэлдэх хүрээлэн хүрэх боломжийг бүрдүүлж, 45 чиглэлд 271 тээврийн хэрэгсэл “Мишээл сити”, “Дүнжингарав” худалдааны төв, Гандийн гудамж, Нийслэлийн гудамж, 120 мянгатын зогсоолоор дамжин үйлчилнэ. Иргэд оршин суугаа хорооллоос “Мишээл сити” болон “Дүнжингарав” худалдааны төвд хүрснээр дараах чиглэлүүдэд үнэ төлбөргүй зорчих боломжтой. Үүнд:

БЭ:1 – “Мишээл сити–Төв цэнгэлдэх /Хурд хороолол/”

БЭ:2 – “Дүнжингарав худалдааны төв–Төв цэнгэлдэх /Суруга/”

Ийнхүү баяр наадмын өдрүүдэд нийтийн тээврийн хүртээмжийг нэмэгдүүлж, иргэдийг аюулгүй, шуурхай зорчих нөхцөлөөр хангаад байна.