Улаанбурхан өвчний батлагдсан тохиолдол долдугаар сарын эхний байдлаар улсын хэмжээнд 14,129-д хүрсэн байна. Тодруулбал 70.8 хувь нь вакцинд хамрагдаагүй, 5.8 хувь нь вакцин хийлгэх нас хүрээгүй, 8.5 хувь нь бүрэн бус тунтай, 15 хувь нь вакцинтай ч халдвар авсан тохиолдол байгаа аж. Иймд Халдварт өвчин судлалын үндэсний төвөөс 15 хүртэлх насны хүүхдүүдийг харьяалал харгалзахгүйгээр бүх өрхийн эмнэлэг, дүүрэг, сумдын эмнэлэгт үнэ төлбөргүй нөхөн дархлаажуулалтад хамруулахаар шийдвэрлэж, эцэг эхчүүдийг хүүхдээ ойролцоох эмнэлэгт аваачиж вакцинд хамруулахыг уриаллаа. Мөн зуны улиралтай зэрэгцэн гэдэсний халдварт өвчин нэмэгдэх хандлагатай тул баяр наадмын өдрүүдэд хоол хүнсний аюулгүй байдалд онцгой анхаарч, бага насны хүүхдүүдийг хэт халалтаас хамгаалахыг зөвлөж байна. Нарших үед суулгах, толгой болон гэдэс өвдөх зэрэг шинж тэмдэг илэрч, гэдэсний халдварт өвчинтэй андуурах тохиолдол гардаг нь хүүхдийн эрүүл мэндэд ноцтой эрсдэл учруулах магадлалтай тул мэргэжилтнүүд сэрэмжтэй байхыг анхааруулж байна.

Улаанбурхан өвчний тархалтаас сэргийлэхэд зориулсан ХӨСҮТ-ийн наадмын үеийн зөвлөмжүүд:

• 15 хүртэлх насны хүүхдүүдийг харьяалал харгалзахгүйгээр өрхийн эмнэлэг, дүүрэг, сумдын эмнэлэгт очиж үнэ төлбөргүй нөхөн дархлаажуулалтад хамруулна уу. Эцэг эхчүүд хүүхдээ заавал вакцинд хамруулахыг анхааруулж байна.
• Гараа тогтмол угааж, хоол хүнсний аюулгүй байдлыг ханган, халдвар тархахаас сэргийлнэ үү.
• Нар салхинаас хамгаалах, бага насны хүүхдүүдийг хэт халалтаас хамгаалж, ус дутагдахаас сэргийлээрэй.
• Баяр наадмын өдрүүдэд хоол хүнсийг сайтар боловсруулж, буруу хадгалах, хүндрэл үүсгэх эрсдэлтэй хоол хүнс хэрэглэхгүй байхыг анхааруулж байна.
• Нарших үед суулгах, толгой болон гэдэс өвдөх зэрэг шинж тэмдэг илэрвэл яаралтай эмнэлэгт хандаж, мэргэжлийн зөвлөгөө авахыг зөвлөж байна.
• Халдвар тархах эрсдэлтэй газраас зайлсхийж, олон хүн бөөгнөрсөн газарт амны хаалт зүүхийг зөвлөж байна.