Үндэсний их баяр наадмыг зохион байгуулах хорооноос баяр наадмын бэлтгэл, зохион байгуулалтын талаар мэдээлэл хийлээ.

Энэ үеэр баяр наадмын суудлын билетийг 100, 130, 150 мянган төгрөгөөр худалдаалах бөгөөд суудлын байршлаас хамаарч үнэ нь ялгаатай тогтоосон байна. Нээлт, хаалтын тоглолтын билетийг 2025 оны долдугаар сарын 2-ны 07:00 цагаас http://enaadam.mn болон http://ticket.mn цахим хуудсаар худалдаалж эхэлнэ. Мөн нээлтийн тоглолтыг орой нь дахин тоглох бөгөөд уг тоглолтын билетийн үнэ 80,000 төгрөг гэж зохион байгуулагчид мэдээллээ.

Бөхийн салбар хорооны дарга Н.Мягмар “Баяр наадмын бэлтгэл ажил нийт 80 хувьтай үргэлжилж байгаа бөгөөд энэ жилийн улсын баяр наадамд 512 бөх зодоглоно. Бөхийн барилдааны бүртгэл долдугаар сарын 9-нөөс эхэлнэ. 512 бөхөөс шөвгөрсөн 32 бөх, мөн сурын харвааны 16 харваачаас допингийн шинжилгээ авах бөгөөд шинжилгээний хариуг богино хугацаанд гаргана” гэв.