Ардчилсан намын бүлгээс үүсээж байгаа нөхцөл байдалтай холбоотойгоор мэдээлэл өглөө. Энэ үеэр УИХ-ын гишүүн Х.Тэмүүжин үг хэллээ.

Тэрбээр “Тохиол гэдэг шиг юм болж байна. Өнөөдөр Төрийн байгуулалтын Байнгын хорооноос УИХ-ын тусгай хяналтын дэд хороо байгуулах талаар ярьж байсан. Хууль сахиулах, гэмт хэрэгтэй тэмцэх, ял эдлүүлэх ажиллагаанд УИХ тусгай хяналт хэрэгжүүлдэг, хуулийг хүрээнд байлгах ёстой. Хэн нэгнийг онилсон мөрдлөг хийж байгаа бол хуулиас гадуурх эрүү шүүлт болон өс хонзонгийн зүйл болно гэж ярьсан. Энэ зүйлийг баталж байгаа юм шиг үйл явдал болж байна. Аль ч Үндсэн хуульд, парламентын ардчилал бүхий улс орны парламентын дээр мөрдөгчид нь гардаггүй юм. Хэн нэгэн улс төрчийн нөмөр нөөлөг дотор дураараа авирлаж болохгүй. Парламент өөрийн гэсэн дархлаатай байх ёстой. Өнөөдөр парламентын гишүүдийг ичээж, айлгах гэж бууны нохой шиг хууль хяналтын байгууллагуудаар ичээж, оролдож эхэлж байгаа бол үүнийг гэмт хэрэг гэж үздэг. Үүнийг зогсоохын тулд АН-ынхан зогсоно. Хонгилын эзэн солигдоход хонгил нурдаг байх ёстой. Нураах ажлыг АН өнөөдрөөс манлайлж хийнэ” гэв.