Хан-Уул дүүргийн есдүгээр хороо, “Сонсголонгийн гүүр”-ний баруун талд бага насны хүүхдүүд “Туул” голын усанд орж байснаас нэг хүүхэд живсэн дуудлагыг зургадугаар сарын 23-ны өдрийн 14:53 цагт хүлээн авсан.

 Нийслэлийн Аврах ангийн алба хаагчдыг очиход Сонгинохайрхан дүүргийн 36 дугаар хорооны оршин суугч 14 настай эмэгтэй А, мөн тус дүүргийн 36 дугаар хорооны оршин суугч 14 настай эмэгтэй Э нар “Туул” голын усанд орж байгаад живэхэд нь голын эрэг дагуу амарч байсан иргэд А-г уснаас татан гаргаж аварсан байсан. Э-г эрэн хайх ажиллагааг зохион байгуулж, 15:15 цагт голын эргээс дөрвөн метрт, голын усны хоёр метрийн гүнээс цогцсыг нь олж гарган Хан-Уул дүүргийн цагдаагийн хоёрдугаар хэлтэст шилжүүлэн өгчээ.