Ой хээрийн түймэр, үер усны аюул, гол усанд осолдож эндэгдэх тохиолдол ихэссэнтэй холбоотойгоор НОБГ мэдэгдэл хийлээ. Энэ талаар нийслэлийн Онцгой байдлын газрын дэд дарга, дэд хурандаа, Э.Батбаяр "2025 он гарсаар цаг агаарын хэт халалт, хуурайшилтын нөхцөл байдлаас үүдэлтэйгээр объектын гал түймрийн 1551, шар өвсний түймрийн 270, ой хээрийн түймрийн дөрөв, аюулт үзэгдэл ослын 94, усны ослын долоон дуудлага дээр ажиллалаа. Дээрх тоо мэдээллийг өнгөрсөн оны мөн үетэй харьцуулахад усны ослын дуудлага 30 хувиар нэмэгдсэн. Объектын болон ой хээрийн түймрийн дуудлага өссөн. Техникийн холбогдолтой ослын дуудлага 60 орчим хувиар буурсан. Хэдийгээр гамшиг ослын урьдчилан сэргийлэх сургалт мэдээллийг эрчимтэй явуулж байгаа хэдий ч иргэдийн санамсар болгоомжгүйгээс үүдсэн гамшиг ослын тохиолдол нэмэгдсээр байгаа юм.

Сүүлийн жилүүдийн цаг агаарын хэт халалттай холбоотойгоор Улаанбаатар хотын ойролцоох нуур цөөрөм, гол, тогтоол ус бараадан аялал зугаалга хийх, архидан согтуурах нь нэмэгдсэнээр 2025 оны эхний зургаан сарын байдлаар харамсалтайгаар таван хүний амь нас эндээд байгаа юм. Үүнтэй холбоотой Монгол Улсын Шадар сайдын баталсан удирдамж, нийслэлийн Засаг даргын баталсан захирамжийн хүрээнд “Гол усны аюулаас урьдчилсан сэргийлэх” нэгдсэн арга хэмжээг нийслэлийн есөн дүүргийн хэмжээнд зохион байгуулж байна.

      Ажлын хүрээнд иргэдэд гүүрэн гарцгүй газраар гол улс машин болон явганаар туулахгүй байх, бага насны хүүхдийг хараа хяналтгүй эрэг дагуу үлдээхгүй байх, согтууруулах ундаа хэрэглэсэн үедээ усанд орохгүй байх зэрэг зөвлөмж мэдээллийг хүргэж байна. Улиас модны цагаан буюу улингарыг иргэд ялангуяа хүүхдүүд шатаах үйлдлийг хийсэнтэй холбоотойгоор ойрын өдрүүдэд галын ослын дуудлага огцом өсөж байна. Өчигдрийн байдлаар нийслэлийн хэмжээнд 27 гал түймрийн дуудлага ирсэн байна. Тиймээс иргэдийг анхаарал боломжтой байхыг онцгой байдлын газраас анхааруулж байна. Нийслэлийн хотын хэт халалт энэ долоо хоногийн эхний гурван өдөр буюу 23-25-ны өдрүүдэд халалт үргэлжилж, +30 хэмийн халуун байна. Долоо хоногийн сүүлийн өдрүүдэд агаарын хэм хоёроос гурван хэм буурч, түр аадар бороо орох төлөвтэй байгаа. Үүнээс хойш ирэх сарыг дуустал хэт халалт үргэлжлэх төлөвтэй байна.