Монгол Улсын Засгийн газар НҮБ-ын Хүний эрхийн ээлжит нэгдсэн хэлэлцүүлэг (URP)-т үндэсний илтгэлээ хүргүүлж, иргэдийнхээ эрхийг хангаж, хамгаалах чиглэлээр хийсэн ажлаа тайлагнадаг тогтолцоотой. Уг тайланг НҮБ-ын гишүүн улсууд хэлэлцээд зөвлөмж өгдөг. Зөвлөмжийг хэрэгжүүлэх үүрэг, амлалтыг Засгийн газар хэрхэн биелүүлж хэрэгжүүлж байгаад УИХ хяналт тавьж оролцох чухал байгааг өнөөдөр Төрийн ордонд эхэлсэн "Хүний эрхийн механизм дахь парламентын оролцоог бэхжүүлэх нь" хэлэлцүүлгийн үеэр хөндөн хэлэлцлээ. УИХ-аас гаргаж байгаа хууль, шийдвэрүүдээ хүний эрхийн шалгуурт нийцүүлэх, гишүүд Засгийн газарт асуулга тавих, тусгайлсан ажлын хэсэг байгуулан ажиллах зэрэг оролцох нь ихээхэн үр дүн авчирдаг хэмээн Олон Улсын Парламентын Холбооны төлөөлөл илтгэлдээ дурдлаа.

Ялангуяа ирэх долдугаар сард Монгол Улс үндэсний илтгэлээ хүргүүлэхийн өмнө энэхүү хэлэлцүүлгийг хийж байгаа нь чухал байгаа юм. Харин эмэгтэйчүүдийг бүх хэлбэрээр алагчлахын эсрэг конвенцид 45 жилийн өмнө нэгдсэн манай улс 2022 онд тайлангаа хүргүүлж, цөөнгүй амлалт авсан. Хэрэгжилтийн явцыг УИХ-ын Нийгмийн бодлогын байнгын хорооны дарга Л.Энхнасан танилцуулж, хэлэлцүүллээ. Гэр бүлийн тухай хууль болон хэд хэдэн хуулийн төслийг шинэчлэн баталсан нь парламент үүргээ гүйцэтгэсэн гэсэн үг гэсэн хэмээн танилцууллаа. Бага насны охидын жирэмслэлтийн тохиолдлыг бууруулах, хүчирхийллийг багасгах чиглэлд түлхүү анхаарна гэдгийг ч тодотгоод байна.