Хятадын дизайнер тоглоомын зах зээлд тэргүүлэгч POP MART компанийн үүсгэн байгуулагч Wang Ning дэлхийн хамгийн амжилттай залуу бизнес эрхлэгчдийн нэгээр тодорчээ. Түүний гаргасан “Labubu” нэртэй хүүхэлдэй сүүлийн жилүүдэд дэлхийн хэрэглэгчдийн сонирхлыг татаж, Ази, Европ, Америк зэрэг бүс нутгуудад борлуулалтын рекорд тогтоогоод байгаа. POP MART-ийн худалдааны цэгүүдэд Labubu хүүхэлдэй худалдаанд гарсан даруйдаа зарагдаж, цуглуулагчдын хувьд хамгийн эрэлттэй бүтээгдэхүүн болсон юм. Wang Ning 2010 онд POP MART-ийг Бээжинд байгуулж, жижиг хэмжээний сонин тоглоом, дизайнер хүүхэлдэй зардаг дэлгүүрээс бизнесээ эхлүүлжээ. Харин өнөөдөр тус компани дэлхийн 20 гаруй оронд салбартай, жилд тэрбум долларын орлого олдог томоохон тоглогч болж чадсан байна. Forbes сэтгүүлийн шинэчилсэн жагсаалтаар Wang Ning 22.7 тэрбум ам.долларын хөрөнгөтэйгээр Хятадын баячуудын эхний 10-д бичигджээ. Тэрбээр дизайнер тоглоомын соёлыг дэлхийд түгээж, залуу үеийн хэрэглээний шинэ чиг хандлагыг тодорхойлогчдын нэгээр үнэлэгдэж байна.