БНХАУ-ын ӨМӨЗО-ны Улаанхад хотын Онниуд хошуу нь  Шар мөрөн болон Нигун голын уулзварт, Хорчины элсний баруун талд байрладаг байна. Тус хот нь 400 мянган хүн амтай, 12000км2 газар нутагтай, нийт газар нутгийн 40 хувийг нь элсэрхэг газар эзэлдэг аж. Энэ бүс нутгийг цөлжихөөс сэргийлэх зорилгоор 1978 оноос элсний нүүдлийг сааруулах үйл ажиллагааг эхлүүлсэн бөгөөд үүний үр дүнд элсэрхэг газар нутагт мод бутлаг ургамал тарьж, элсний нүүдлийг зогсоож чаджээ. Ингэхдээ эл үйл хэрэгт юуны өмнө нутгийн иргэд, малчид тариачдыг татан оролцуулж, нутаг газрынхаа элсний нүүдлийг зогсооход гар бие оролцвол Засгийн газраас  урамшуулал, олговор өгөх байдлаар дэмжиж ирсэн байна. Элсний нүүдлийг сааруулахдаа дөрвөн талдаа хоёр метрээс хэтрэхгүй шоо дөрвөлжин байдлаар хулс мэт босоо ургамлыг элсэнд шигүү хатгаж эгнүүлэхийн зэрэгцээ элсэн толгод дундуур авто замыг олноор барьсан байна. Мөн иргэд мод бутаа унаа машинаар элсэн дунд зөөж хүргэх боломжийг хангах, хөрс шороо голдоггүй, усалгаа бага шаарддаг бургас, харгана, арц, нэгэн зүйлийн гацуур зэрэг модыг тарьдаг гэнэ. Эдгээр тарьсан модоогурван жилдээ хүний гар оролцоотойгоор  бага зэрэг арчлан ургуулж чадвал цаашдаа өөрөө бие даан ургах боломж бүрддэг байна.Энэхүү ойжуулалтын хүрээнд экологийн тэнцвэрт байдал сэргэж, элдэв төрлийн шавьж, мэрэгч, шувууд, туурайтан зэрэг амьтдын амьдрах таатай орчин бүрджээ. Цаашлаад элсэрхэг нутгийн хэсэг газрыг сонгож, цөлжилтөөс хамгаалах, мод бут тарих арга хэрэглэлгүй байгалийн өөрийн нь дагшин байдлаар үлдээж, түүнийг эрдэм шинжилгээ судалгааны болон экологийн зориулалтаар судалдаг байна.