Нийслэлийн удирдлага, Эрүүл мэндийн газрын дарга нарын хууль бус үйл ажиллагааны талаар сэрэмжлүүлэх нь  

     Үндсэн хуулиар баталгаажсан Улсын дээд шүүхийн эцэслэн гарсан шийдвэрийг хэрэгжүүлэхгүй, хууль зөрчсөн шийдвэр гаргаж байгаа хотын удирдлага, дарга Х.Нямбаатар, түүний дор үүрэг гүйцэтгэж байгаа Нийслэлийн эрүүл мэндийн газрын дарга нарын хууль бус үйлдлүүдийн талаар 2025.02.24-д танд ил захидлаар хандсан билээ. УАУЭСКТ-ийн менежментийн хувьчлалыг дуусгавар болгохыг даалгасан УДШ-ийн шийдвэрийг Нийслэлийн удирдлага хэрэгжүүлэхгүй, Менежментийн багийн бие даасан үйл ажиллагааг явуулах боломжийг бүрдүүлэхгүй, эмнэлгийг хүчээр өөрийн төсөвт байгууллагын харьяалалд байлгасаар байгаа. 34 жилийн турш тасралтгүй эмнэлгийн тусламж үйлчилгээ үзүүлж байгаа байгууллагын хувьчлалыг дуусгавар болгохгүй эрх мэдлээ ашиглан төсөвт байгууллага хэвээр байлгаж, санхүүжилтийг  гэв гэнэт таслан зогсоож, 100 гаруй эмч, ажилтны цалинг зогсоож хүмүүсийг хохироож байгаа. 

      2025 оны хоёрдугаар сарын 24-ний өдөр НЭМГ-ын Санхүү хөрөнгө оруулалтын хэлтсийн эдийн засагч Отгонжаргал тус клиник төвийн ерөнхий санхүүч Л.Байгальмаатай ярьж, “Х.Гүрбазар захирлын эрхээр” зөвхөн цалингийн гүйлгээ хийнэ. Өөр ямар ч гүйлгээ хийхгүй, цалингийн гүйлгээг шивж оруул гэсэн. Энэ дагуу Х.Гүрбазар захирлын гарын үсэг, байгууллагын хүчин төгөлдөр тамга бүхий хүсэлтээр тус төвийн ажилтнуудын цалингийн гүйлгээ хийгдсэн. Энэ нь Нийслэлийн Засаг дарга телевизээр Менежментийг багийг тамгаа аваад зугтсан, ажилчдын цалинг тавиулах гэхээр болохгүй байна гэсэн нь худал мэдээлэл тараасан байсан гэдгийг нотолж байна. 

       Хотын удирдлага биднийг “Тамгаа аваад зугтсан” гэдэг худал мэдээлэл тараасны цаана хууль бусаар шинээр тамга хийлгэх оролдлого явагдаж байсан бөгөөд Улсын бүртгэлийн албанаас энэ сарын 21-нд эмнэлгийн гүйцэтгэх захирал Х.Гүрбазарт хандаж, “Тамга гээгдүүлсэн тул шинээр бүртгүүлэх хүсэлт ирж байгаа нь ямар учиртай болох талаар тайлбараа ирүүлэх”-ийг утсаар мэдэгдсэн. Бүртгэлийн газарт бид холбогдох баримт тайлбарыг гаргаж өгсөн. Гэтэл хуулийн хүчин төгөлдөр эрх бүхий томилогдсон захирал, хуулийн хүчин төгөлдөр эрх бүхий тамга байсаар байхад НЭМГ-аас тус төвийн захирлаар  хууль бусаар томилогдсон захирал гэх Дэлгэрбаяр нь УАУЭСКТ-ийн Улсын бүртгэлийн   гэрчилгээ, тамгыг дахин хийлгэж байгаа нь хууль зөрчсөн үйлдэл бөгөөд энэ үйлдлийн талаар тодруулах, тайлбар өгөх зорилгоор Чингэлтэй дүүргийн улсын бүртгэлийн хэлтэстэй 2025.02.25 өдөр манай байгууллагын итгэмжлэгдсэн төлөөлөгч очиж уулзан, Шүүхийн шийдвэрүүд болон Нийслэлийн эрүүл мэндийн газрын даргын тушаалыг түдгэлзүүлэх Захиргааны хэрэг үүсгэж байгаа тухай тайлбарлахад ахлах мэргэжилтэн нь “Цагдаагаас бичиг” ирсэн учраас манайх бүртгэсэн, Ерөнхий газраас танайд бичгээр хариу өгнө”  гэсэн. Хууль бусаар томилогдсон захирал Дэлгэрбаяр, хууль бусаар хийлгэсэн тамгатай холбоотой аливаа хууль бус үйл ажиллагаанаас үүдэлтэй хариуцлагыг Менежментийн баг, тус багаас томилогдсон албан ёсны гүйцэтгэх удирдлага хариуцахгүй. Тиймээс Нийслэлийн удирдлага, Эрүүл мэндийн газрын дарга нарын хууль бус үйл ажиллагааны талаар Хууль зүй, дотоод хэргийн сайд танаа болон олон нийтэд сэрэмжлүүлж байна. 

     УАУЭСКТ-ийн менежментийн баг нь хуулийн дагуу гаргасан аливаа шийдвэрийг дагаж мөрдөнө. Хуулийн дагуу шийдвэр гарвал байгууллагын тамга тэмдгийг хүлээлгэн өгнө. Харин хууль бус шийдвэр гаргаж байгаа хотын удирдлага, нийслэлийн эрүүл мэндийн газрын дарга нарын үйлдлийг дагалдан өөрсдөө хууль зөрчигч болохгүй. УАУЭСКТ-ийн менежментийн хувьчлалыг дуусгавар болгох талаар гарсан Монгол Улсын дээд шүүхийн шийдвэрийг хэрэгжүүлэхэд, Улаанбаатар хотын удирдлагуудын хууль бус үйлдлийг зогсооход хуулийн хүрээнд дэмжлэг үзүүлнэ үү. 

Мэргэжлийн багийн ахлагч  Ж.ХАТАНБААТАР 

Улаанбаатар хот 2025.02.26