Хөвсгөл аймгийн Тосонцэнгэл суманд бренд бүтээгдэхүүн сурталчилахаар 99.9 сая төгрөгөөр ариун цэврийн өрөө шиг байр барьсан гэх мэдээлэл олон нийтийн сүлжээгээр цацагдсан. Энэ талаар Тосонцэнгэл сумын Засаг дарга Ц.Мөнхөөгөөс тодрууллаа.

 Тэрбээр “Аймгийн орон нутгийн хөгжлийн сангаас 99.9 сая төгрөгөөр манай суманд бренд бүтээгдэхүүн сурталчлах зориулалтай 13х6 метр хэмжээтэй ногоон алаг байр барьж өгсөн. Гэтэл сонгуультай холбоотойгоор тус байрны хажууд байсан саравчны зургийг олон нийтийн сүлжээнд байршуулж, намайг харлуулах зорилготойгоор хуурамч мэдээлэл тарааж байгаа. Тус байр өнгөрсөн онд ашиглалтад орох ёстой байсан. Одоо дотор засал дутуу, дулаан ирээгүй байгаа болохоор иргэд үйл ажиллагаагаа эхлүүлэхгүй байна. Уг нь иргэдийг ажлын байртай болгох зорилгоор барьсан барилга юм.  Энэ жил сүү сааль муутай байсан болохоор иргэд төдийлөн ач холбогдол өгөхгүй байгаа” гэв.