Хорооллын эцэст байрлах "Алтай" зочид буудалд тусгаарлагдаж байсан 29 хүнээс энэ сарын 7-нд коронавирусийн халдвар илэрсэн. Энэ талаар Эрүүл мэндийн яамнаас тодорхой мэдээлэл өгөөгүй. Харин тус зочид буудалд тусгаарлаагдаж байгаад халдвар авсан гэх иргэд манай сайтад хандсан юм. Тэд тусгааарлалтын байрны халдвар хамгааллын дэглэм зөрчигдсөн, эмч ажилчид хамгаалалтын хувцаса солихгүйгээр бүх хүмүүсээс шинжилгээ авдаг гэх гомдлыг ярьж байсан. Тиймээс тусгааарлалтын байрнаас гэр бүлээрээ халдвар авсан гэх мэдээллийг бидэнд өгсөн юм. Энэ талаар Эрүүл мэндийн яамны мэдээллийн үеэр ХӨСҮТ-ийн Тандалт, судалгааны албаны дарга А.Амбасэлмаагаас тодрууллаа.

- “Алтай” зочид буудалд тусгаарлагдаж  байсан 29 хүнээс халдвар илэрсэн байна. Халдвар авсан хүмүүс "тусгаарлагдах байрнаас халдвар авчихлаа" гэх гомдол ирүүлсэн.  Иргэд тусгаарлалтын байрнаас халдвар аваад байгааа юм биш үү. Хяналт шалгалтыг хэрхэн хийж байгаа вэ?

-“Алтай” зочид буудалд байрласан хорин хэдэн хүнээс халдвар илэрсэн. Тухайн зочид буудалд батлагдсан дөрвөн тохиолдлын ойрын хавьтлын хүмүүсийг тусгаарласан. Хүмүүсийг нэг нэгээр нь гэр бүлийн хүмүүсийг хамтад нь тусгаарласан. Зургаан  гэр бүлийн хүн өвчилсөн. 14 хоног дотроо халдвар илэрч болох нууц үеийн хугацаандаа эрсдэл байна гэж үзээд ойрын хавьтлыг тусгаарладаг. 

-"Алтай" зочид буудлыг хэзээнээс тусгаарлах байрны зориулалтаар ашиглаж эхэлсэн бэ? 

“Алтай” зочид буудал тусгай үүргийн онгоц авчрах үеэс эхлээд ажиглан тусгаарлах байраар сонгогдон ажиллаж байгаа. Тэнд  ажиллаж байгаа хүмүүс хяналт тавихын хажуугаар мэргэжлийн байгууллагууд бас давхар хяналт тавьж байна. Манай ХӨСҮТ хүмүүсээ байрлуулах тэдэнд шинжилгээ хийх үйл ажиллагааг зохион байгуулдаг. 

-Эмч ажилчид халдвар аваад байна. Хаанаас халдвар аваад байгааг тогтоосон уу. Хамгаалах хэрэгсэл, хувцас хангалттай бий юу?

-Эмч, ажилчид халдварт өртөж байна.  Хамгаалах хувцас хэрэглэл хангалттай тавьж өгч байгаа. Ажилбар хийх, хувцасаа тайлах явцдаа халдвар авах эрсдэлүүд өндөр байна. Хэдийгээр хамгаалах хувцас хэрэглэлээ өмсөж  хэвшсэн боловч олон хоног ажиллаад ядарсанаас болдог ч юм уу, ямар нэгэн санамсаргүй алдаанаас болоод халдварт өртөж байна. Энэ байдлыг арилгах, ачааллыг багасгах, хүмүүсээ дархлааажуулах тал дээр ХӨСҮТ тусгайлан арга хэмжээ авч ажиллаж байгаа.