Архангай Улаанбаатар чиглэлд хувийн унаагаар зорчиж, 22-ын товчоогоор нэвтэрч чадалгүй гацсан зургаан иргэний нэг болох 58 настай эмэгтэй О-гийн бие муудаж түргэний эмчээс анхан шатны тусламж авах үеэрээ амь насаа алдсан. Тэгвэл Улсын онцгой комисс талийгаачийн гэр бүл, төрөл төрөгсдөд гүн эмгэнэл илэрхийлж, ажлын хариуцлага алдсан, асуудалд хүнлэг ёсоор хандаж түргэн шуурхай шийдвэрлээгүй хүмүүст хариуцлага тооцохыг Эрүүл мэндийн сайд Т.Мөнхсайхан, Нийслэлийн Засаг дарга бөгөөд Улаанбаатар хотын захирагч Д.Сумъяабазар, Архангай аймгийн Засаг дарга Д.Золжаргал нарт үүрэг болголоо. Энэ хэргийг хууль хяналтын болон бусад холбогдох байгууллага шалгаж байна.