Улаанбаатар хот руу орохоор өчигдөр 22:00 цагийн үед 22-ын товчоон дээр ирж, PCR шинжилгээний хариугүйн улмаас гацсан Архангай аймгийн 58 настай эмэгтэй О-гийн бие муудаж, өнөөдөр 07:00 цагийн орчимд нас барсан байна. Энэ талаар НОК-ын шуурхай штабын удирдлагын багийн гишүүн Э.Эрдэнэбаатар "Талийгаачийн бие муудаж яаралтай түргэн тусламж дуудсан боловч анхан шатны тусламж үзүүлэх хугацаанд иргэн амьсгал хураасан байна. Тус хэргийг холбогдох албан байгууллагууд шалгаж ажиллаж байна" гэлээ. Тухайн үед түргэвчилсэн оношлуурын шинжилгээгээр коронавирус илрээгүй. Хэргийн газар цагдаа, шүүх эмнэлгийн байгууллага ажиллаж, талийгаачийн ар гэрийнхнээс мэдүүлэг авч байна гэх мэдээлэл байна.

Мөн энэ талаар ЦЕГ-ын Хэвлэл мэдээллийн төвийн дарга Б.Баатархүүгээс тодруулахад “22-ын товчоон дээр Архангай аймгийн иргэн нас барсан нь үнэн. Ямар шалтгааны улмаас нас барсан нь тогтоогдоогүй байна. Нийслэлийн онцгой комисс болон Эрүүл мэндийн байгууллагаас нарийвчилсан үзлэг хийсний дараа шалгалтын ажиллагааг үргэлжлүүлнэ” гэлээ.