Эрүүл мэндийн яамнаас цаг үеийн асуудлаар ээлжит мэдээлэл хийлээ. Энэ үеэр ХӨСҮТ-ийн Тандалт, судалгааны албаны дарга А.Амбасэлмаа "Өнгөрсөн 24 цагийн хугацаанд  ХӨСҮТ-ийн вирус судлалын хоёр, ЗӨСҮТ-ийн лаборатори, явуулын хоёр авто лаборатори, Дархан, Сэлэнгэ, Орхон, Дорноговь аймагт  ажиллаж буй салбар лабораторид нийт 27488 хүнд PCR шинжилгээ хийлээ. Хавьтлуудын давтан шинжилгээгээр Улаанбаатарт 1609, Сэлэнгэд 709, Дорноговь аймгийн Замын-Үүд суманд 215 хүнд шинжилгээ хийсэн. Ингэхэд нэг хүний шинжилгээнд буюу Сэлэнгэ аймагт нэг тохиолдол нэмэгдсэн. Сэлэнгэ аймагт 204,  Улаанбаатар 128, Дархан-Уулд 45, Орхонд 25, Дорноговьд 31, Говьсүмбэрт дөрөв, Архангайд гурван батлагдсан тохиолдол байна.

Ийнхүү дотоодын халдвар 440, манай улсад бүртгэгдсэн 888 тохиолдол бүртгэгдлээ. Үүнээс 384 хүн эдгэрлээ. Цэргийн төв эмнэлэг, Сэлэнгэ аймгийн нэгдсэн эмнэлэг, ХӨСҮТ-ийн клиникт 495 хүн эмчлэгдэж байна. Биеийн байдлаар үнэлбэл маш хүнд нэг, хүнд долоо, хүндэвтэр 67, хөнгөн 420 хүн байна” гэв.