Баянгол дүүргийн цагдаагийн нэгдүгээр хэлтсээс зохион байгуулж буй “Хамтдаа хамгаалъя” аянд МУГЖ Т.Ариунаа “Хайраар урлан бүтээдэг” дуугаараа нэгдэж, “Хайраар урлан бүтээв, хамтдаа хамгаалъя” уриалгыг тавдугаар сарын 21-нээс эхлэн орон даяар явуулсан. Тэгвэл тус уриалга нийслэл болон орон нутагт амжилттай өрнөж, олон сайхан хувь хүн байгууллага нэгдэн оролцож өндөрлөлөө.

      Тус аяны гол зорилго нь хүүхдийн эрхийг хамгаалах, тэднийг аливаа эрсдлээс сэргийлэх, эерэг аргаар хүмүүжүүлэх, ёс суртахууныг гэр бүлд нь төлөвшүүлэх, эцэг, эхийн үүрэг оролцоог нэмэгдүүлэх, хүүхдийн хүмүүжил төлөвшилд эерэгээр нөлөөлөх бүжиг, спортод уриалан явуулах юм.

         МУГЖ Т.Ариунаагаас бид энэхүү уриалгынх талаар тодруулахад ”Хайраар урлан бүтээв, хамтдаа хамгаалъя” уриалга маш амжилттай болж өндөрлөлөө. Нийслэлийн дүүргээс болон Ховд, Завхан, Архангай, Дархан зэрэг найман аймгийн ээж нар манлайлан оролцож, дуулж, бүжиглэж байгаа бичлэгээ илгээлээ. Тухайлбал, "Ирээдүй цогцолбор" сургуулийн сурагч Д.Марал, "Эрдмийн өргөө" 40 дүгээр сургуулийн 3-9 дүгээр ангийн сурагчид, Сүхбаатар дүүргийн хоёрдугаар цэцэрлэгийн Г.Дэлгэрсайхан багштай хамт олон, Баянгол дүүргийн "Эрдмийн өргөө" цогцолбор сургуулийн хоёрдугаар ангийн сурагчид, Ховд аймгийн гуравдугаар цэцэрлэгийн багачууд,Орхон аймгийн 15 дугаар цэцэрлэгийн бэлтгэл Б бүлэг болон "Бүжиг" бүжгийн дугуйлангийн хүүхдүүд, зургаан настай Б.Болор-Эрдэнэ, Нийслэлийн ерөнхий боловсролын лабораторийн 12 дугаар цэцэрлэгийн Т.Азжаргал, Хан-Уул дүүргийн "Шүүдэр" цэцэрлэгийн хүүхдүүд, Булган аймгийн Булган сумын Л.Наранзаяа багштай "Амьдрах ухаан" сургалтын төвийн уран зургийн дугуйлангийн сурагчид, Багахангай дүүргийн сурагч Мишээхнаран, Завхан, Ховд, Сүхбаатар аймгийн сурагч болон ээжүүд сэтгэл зүрхээрээ нэгдэн бичлэг илгээж, бидний аянд идэвхтэй оролцлоо. Хамгийн сүүлд гэхэд Улаанбаатар Дулааны Сүлжээ “ТӨХК”-ийн хамт олон нэгдлээ. Сошиал орчинд олон ч хүн үзэж, сэтгэгдлээ бичсэн байна. Идэвхтэй оролцсон бүх хүнд баярлалаа. Хүүхдийн дуу ховордсон энэ цаг үед “Хайраар урлан бүтээдэг” дууг мэдэж суралцахын сацуу хүүхдүүдээ хайрлаж, тэднийг хүндэтгэж, гэгээн ертөнцийг нь үргэлж хайраар дүүргэж байхыг уриалсан уриалгад  сэтгэл зүрхээрээ оролцсон хүн бүрд баярлалаа” гэв.