УИХ-ын нэгдсэн чуулганаар Үндсэн хуулийн нэмэлт, өөрчлөлтийн төслийг хэлэлцэж байна. Энэ үеэр УИХ-ын гишүүн Т.Доржхандаас Үндсэн хуулийн нэмэлт, өөрчлөлтийн талаар тодрууллаа.

      Тэрбээр “Бэрхшээлтэй цаг үед өөрчлөлт яригдаж байна. Иргэдийн саналыг сонсохоос гадна улс төрийн намуудын зөвшилцөл, ойлголцол чухал. Анх манай нам 152 гишүүнтэй тогтолцоо нь 50/50 байх ёстой гэдэг дээр хатуу байр суурьтай байсан. Учир нь, судалгаан дээр үндэслэж ийм тооцоо гаргасан. Нэгдүгээр хэлэлцүүлгийн дараа гишүүдийн тоог буулгах саналтай болсон. Тухайн үед Ардчилсан намын саналаар 60/40 гэсэн харьцаанд авчирч тоог нь 126 болгоё гэсэн. Өчигдөр бүлгийн уулзалтын дараа 78/48 гэсэн харьцаан дээр тогтсон. Ингэснээр 60/40 гэсэн Ардчилсан намын харьцаа хадгалагдаж байна. Харин мандатын тоо Улаанбаатар хотод нэмэгдэх ёстой гэдэгт зарчмын хатуу байр суурьтай байгаа. Өнөөдөр Монгол Улсын хүн амын 50-иас дээш хувь нь Улаанбаатар хотод бүртгэлтэй, 60 орчим хувь нь Улаанбаатар хотод амьдардаг. Нэг УИХ-ын гишүүн 100 мянган хүнийг төлөөлж байсан бол өөрчлөлт хийгдсэнээр дунджаар 30-40 мянган иргэнийг төлөөлөх болно. Ийм учраас Улаанбаатар хотын мандатыг нэмэгдүүлэх хэрэгтэй гэдэгт саналд нэгдсэн” гэв.