Монголын Үндэсний бөхийн холбооны тэргүүлэгч гишүүдийн ээлжит хурлаар зураан бөхийн барилдах эрхийг хассан байна. Үүнд улсын харцага Ш.Уламбаярыг "Дөрөвдүгээр сарын 8-ний барилдаанд учраа бөхөө нидэрсэн болон барилдааны жаяг дэгийг зөрчсөн" хэмээн үзэж, барилдах эрхийг нь нэг сараар хасах шийдвэр гаргажээ. Тус шийдвэртэй санал нэгдэж байгаа эсэх талаар улсын харцага Ш.Уламбаяраас тодрууллаа.

   Тэрбээр “Дөрөвдүгээр сарын 8-нд Архангай аймгаас төрөн гарсан таван аваргын нэрэмжит 256 бөхийн барилдаан болсон юм. Тус барилдааны үеэр сумын заан М.Сумъяабазарыг давах үедээ дээрээс нь дараад уначихсан юм. Тухайн үед би түүнийг давсан боловч М.Сумъяабазарыг давуулж байсан. Гэтэл өчигдөр Үндэсний бөхийн холбооны тэргүүлэгч гишүүдийн ээлжит хурлаар намайг буруутгаж нэг сар барилдах эрхийг минь хассан байна. Шинэ дүрэм, журам гарсан юм байлгүй гээд гаргасан шийдвэртэй санал нэгдэж байгаа. Нэг сарын хугацаанд барилдах эрхгүй ч гэлээ бэлтгэлээ таслахгүй хийнэ” гэлээ.