Иргэдийн цалин, тэтгэвэр нэмэх шийдвэрийн талаар МАН-ын Бүлгийн дарга Д.Тогтохсүрэн, Сангийн сайд Б.Жавхлан, ХНХ-ын сайд Х.Булгантуяа нар мэдээлэл өглөө. ХНХ-ын сайд Х.Булгантуяа энэ үеэр төсвийн тодотгол, тэр дундаа цалин тэтгэврийн нэмэгдэлтэй холбоотой сэдвээр мэдээлэл хийлээ.

Тэрбээр “Төрийн албан хаагчдын цалинг нэмэгдүүлэх асуудал дээр иргэд  цалингийн хэмжээний талаар их ярьж байна. Мэдэгдээгүй байхад худал мэдээлэл тарах эрсдэлээс сэргийлж зарим зүйлийг тодруулж хэлье. Төрийн нийтлэг үйлчилгээний албан хаагчдын  хамгийн доод цалин 565 мянга байгаа. Үүнийг долдугаар сарын 1-нээс 750 мянга болгож нэмэгдүүлнэ. Мөн төрийн үйлчилгээний албан хаагчид дотор төрийн нийтлэг үйлчилгээ болон төрийн  бусад үйлчилгээ буюу эрүүл мэнд,  боловсрол, шинжлэх ухаан гэж явдаг байсан. Үүнийг нэгтгэж төрийн  мэргэжлийн үйлчилгээ гэх нэг ангилалд авч үзэхээр болсон. Ингэснээр төрийн албан хаагчдад ангилал, ялгаатай байдал, цалигийн ялгаатай байдал үүсдэг байсныг арилгаж байгаа юм. Төрийн захиргааны албан хаагчид буюу яамны албан хаагчид бусад захиргааны байгуулга , агентлагаас арай өндөр цалинтай байдаг. Үүнийг аравдугаар сарын 1-нээс тэгшитгэж,  төрийн захиргааны бүр байгууллагын суурь цалин, хамгийн бага хэмжээндээ  нэг сая төгрөг байна. Төрийн тусгай албан хаагчдын хувьд цагдаа, дотоод цэргийн ангийнхны цалингийн хэмжээ бусдынхаасаа өөр байсан. Цагдаагийн цалин 999800 төгрөгөөс эхэлж байсныг нэг сая төгрөг болгохоор болсон. Мөн бусад төрийн тусгайныхны  цалин нэмэгдэнэ. Тэтгэврийн зөрүү бол ахмадуудын хамгийн их ярьдаг сэдэв. Үүнээс хойш 2014 онд хамгийн сүүлд  шинэчилсэн юм билээ. Бүх ахмадуудын тэтгэвэр 10 хувиар нэмэгдэнэ”гэв .