ЭМЯ-наас 11:00 цагт коронавирусийн талаар цаг үеийн мэдээлэл хийдэг билээ. Үүний дараагаар сэтгүүлчдийн асуултад албаны хүмүүс хариулсан юм. 

-119.мн сайт ажиллахгүй байна. Шинжилгээ өгсөн хүний хариу гарахгүй байна гэсэн. Энэ талаар мэдээлэл өгөхгүй юу?

-Шинжилгээ авч байгаа хүмүүс иргэдийн овог нэрийг гаргацтай, зөв бичих хэрэгтэй. Гаргацгүй бичсэнээс болж шинжилгээний хариугаа шивэхэд төвөг учирч байна. Лабораториос  тэс дараагаар нь тааруулж тулгаж байж хариу гардаг учир үүн дээр цаг алдаж байна. Лаборатори дээр олон хүн ажиллаж байгаа. Утас, техникийн саадлыг мэргэжлийн хүмүүс сайжруулж ажиллаж байна. Өдөрт 4-5 мянган хүн зөвлөгөө авч байгаа учир ачаалал ихтэй байна.

-Голомтод ажиллаж байгаа цагдаа нарын эрүүл мэндэд хэрхэн анхаарч байна вэ?

-Төрийн албан хаагчид, тагнуулийн ажилчид, эмч нар ээлжээр ажиллаж байна. Биеийн эсэргүүцлийг сайжруулах, тодорхой чиглэл заавар баримтлан ажиллах талаар зөвлөгөө өсгөн. Мөн харьяа байгууллагууд ажилчдынхаа эрүүл мэндэд анхаарч ажиллаж байна.

-Халдвар илэрсэн байрнуудад эмнэлэгийн түргэн тусламж очихгүй байгаа гэсэн энэ үнэн үү?

-Эмнэлгийн тусламж үйлчилгээ хэвийн явагдаж байна.

-Анх өвчилсөн иргэдийн биеийн байдал ямар байна вэ?

-Өвчтний биеийн байдлыг үнэлэхийн тулд  тусгаарлан ажиглах байранд тусгаарлаад асуумж судалгаа авч, давтан шинжилгээнд хамруулж, мэргэжлийн хяналтын газраас хянаж давхар ажиллаж байгаа. Биеийн байдал сайжирч байгаа.

-Коронавирусээр өвчилсөн иргэдийн эмчилгээний зардал үнэтэй байна. Судалгааг хэрхэн гарсан бэ?

-ЭМЯ-ны харьяа баг гарч эмчилгээний зардал,  дүнг 6.7-9 сая байхаар гаргасан. Вирусийн эсрег эм, бэлдмэл болон маш хүнд өвчтэй иргэдэд эмнэлгийн бэлэн байдал, эмчилгээний эм бэлдмэлийг хангах хэрэгтэй.  Харин  хөнгөн туссан хүнд үнэтэй эм, бэлдмэл өгч, эмчилгээ хийхгүй. Эмнэлгийг бүрэн хоол хүнсээр хангах, ээлжээр хонож ажиллаж байгаа ажилчид , тухайн хүний ойрын болон дам хавьтлыг илрүүлэх зэрэг бүх төрлийн үйлчилгээг хамруулбал үүнээс өндөр дүн гарна. Хүн бүрт тусгайлан эмчилгээний зардлыг тэмдэглэж байгаа учир хэдэн сая төгрөг гарсан нь тухай бүрт бичигдэж байгаа. Хамтын ажиллагааны дүнд гаргасан судалгааны дүн  учир та бүхэн эргэлзэх хэрэггүй.

-Хөл хориог зөрчиж коронавирус тараасан тохиолдол бий юү?

-Ард иргэд хөл хорионы дэглэмээ чанд баримтласан байна. Хөдөө орон нутаг руу буцах 12 мянган иргэнд шинжилгээ хийхэд ийм асуудал гараагүй. Хөл хорионы дэглэмийг зөрчвөл хуулийн хариуцлага хүлээнэ.

-Баянзүрх дүүргийн нэгдсэн эмнэлэгт халдвар гарсан гэсэн мэдээлэл байна. Үнэн үү?

-Өнгөрсөн сарын 16-нд амьсгалын замын шинж тэмдэгтэй иргэн эмнэлэгт ирсэн. Бид тусгаарлан ажиглах байранд оруулж шинжилгээ хийсэн. Шинжилгээ гарч ХӨСҮТ рүү шилжүүлэн эмчилж байна. Амьсгалын замын ханиадтай иргэн.

-Хэдэн хүнээс түргэвчилсэн оношлуураар шинжилгээ авсан бэ. Энэ оношлуурт хэдэн төгрөг зарцуулсан бэ?

-Түргэвчилсэн оношлуураар 54690 гаруй хүнийг шинжилгээнд хамруулсан.