Орон нутгийн иргэдийг шинжилгээнд хамруулж, ирэх сарын 1-нээс нутаг буцаах шийдвэрийг УОК гаргасан билээ. Иргэд 119.mn цахим хаягаар шинжилгээ өгөх газраа сонгон цагийн хуваарийн дагуу шинжилгээнд хамрагдаж буй. Гэхдээ  иргэдийн дараалал хэт олон байгаагаас үүдэн олон цагаар гадаа дугаарлаж зогсох нь багагүй хүндрэл дагуулахаас гадна иргэдийн чих, хацар хайрагдах, доороосоо даарах, ханиад, томуу хүрэх зэрэг эрсдлүүдийг дагуулаад эхэлжээ. Тухайлбал, шинжилгээ өгч болно гэх цагийн хуваарийн дагуу очсон Н.Г “Би өчигдөр 15:10 цагт шинжилгээ өгөх ёстой байсан. Хүмүүс цаг хамаарахгүй дугаарлаад байна гэхээр нь 13:00 цагаас очиж, дугаарласан. Дөрвөн цаг гадаа зогсож байж, 17:10 минутад шинжилгээгээ өгсөн. Өвлийн хүйтэнд, цементэн дээр удаан зогссон учир доороосоо их даарсан. Орой гэртээ иртэл хөл хайрагдсан байсан. Гэртээ харихын тулд их даарсан ч шинжилгээгээ өгөхөөс өөр арга байхгүй учраас тэвчсэн. Анх бүртгүүлсэн цагтаа шинжилгээ өгч амжихгүй бол бүр долоо, найм хоногийн дараагийн дугаар өгч байна гэсэн учраас тэссэн” хэмээлээ.

Түүнчлэн “Хөдөө, орон нутгаас ирсэн настай хүмүүс, бага насны хүүхдээ үлдээх айлгүй иргэд тэнд олноороо байсан бөгөөд цөөнгүй хүний чих, хацар хүйтэнд хайрагдаж, даарч байсан. “Ханиад хүрээд ч хамаагүй шинжилгээгээ өгч, гэртээ харих минь” гэсэн хүмүүс тэнд олон байсан. Зохион байгуулалт муу дээр хүмүүс дараалал дайрах, шахах зэрэг ухамсаргүй байдал нийлээд нэлээд эрсдэл бий болгож байсан” гэсэн юм.