Дундговь аймагт өнөө өглөө “Нар гурав болж харагдсан” хэмээн иргэд нарны зургийг цахим хуудастаа олноороо нийтэлсэн. Энэ үзэгдэл нь ямар учиртай болохыг Одон орон, геофизикийн хүрээлэнгийн эрдэм шинжилгээний ажилтан Д.Батмөнхөөс тодрууллаа.

-Өнөө өглөө Дундговь аймагт “нар чихлэх” үзэгдэл ажиглагдсан байна. Яагаад “нар чихлэдэг” вэ?

-Гэрлийн хугарлын нөлөөгөөр нар гурав болсон мэт харагддаг эл үзэгдлийг шинжлэх ухаанд  "хуурамч нар", харин монголчууд "нар чихлэх", "нар гуравлах" хэмээн нэрлэдэг.  “Нар чихлэх” нь хүйтэн агаарт байгаа усны молекулууд хөлдөж талстжаад, түүнд нарны гэрэл ойхдоо солонгорон харагддаг байна. Манай оронд хааяа үзэгддэг бөгөөд Европ, Хойд Америкийн орнуудад элбэг тохиолддог. Ихэвчлэн нар мандах эсвэл жаргах үед ажиглагддаг учир богино хугацаанд үзэгддэг.

-Өдийн үед “нар чихлэх” үзэгдэл ажиглагдах нь байгаль, цаг уурт ямар нэг өөрчлөлт гарахын дохио гэж хөгшчүүл хэлж байна. Энэ үнэн үү?

- Хүйтний эрч чангарах шинжийг илэрхийлдэг. Гэхдээ хүйтэн өвөл болно гэсэн үг биш. Агаар мандалд илүүтэй хүйтэн байсан гэсэн үг.